Валериан Иванович Шаров 1951 çулхи декабрĕн 13-мĕшĕнче Ырашпулӑх ялĕнче çуралнӑ. Çемьере тӑватӑ ачаран вăл чи асли. Арçын ача ултӑ çулта чухне темле майпа пÿрте кĕнĕ шар çиçĕмĕ кӑмака мӑрйине ватса хӑварнипе çырлахман, çывăракан амӑшне те вĕлернĕ.
1958 çулта Валерий Ырашпулӑхри пуçламӑш шкула каять, Ишек шкулĕнче тӑватӑ çул ăс пухнă хыççӑн Сĕнтĕрвӑрринчи училищĕне çул тытать. Унта шофер-тракторист специальноçне алла илет. Çуллахи вӑхӑтра каччă вĕренме Ырашпулӑхран велосипедпа Сĕнтĕрвӑррине çӳренĕ. 1968 çулта алла документ илсен Валерий тӑван «Слава» совхозра тракторист ĕçне кӳлĕнет.
1971 çулхи майӑн 3-мĕшĕнче хĕсмете кайма ят тухать унăн. Самар (Куйбышев пулнӑ) хулинчи учебкӑра унпа пĕрле 84 чӑваш каччи вĕреннĕ. Командир кашни ачана алӑ парса ӑсатнӑ. Валерий БМП наводчик-операторĕ пулнӑ. Вӑл вӑхӑтра çак машинăна пысӑк вӑрттӑнлӑхра тытнӑ. Вĕрентнĕ чух тетрадьри кашни страницăна номерлесе панӑ, салтаксем çырса пынине тĕрĕслесех тӑнӑ. Тетрадьрен пĕр страницăна та çухатма юраман. Самарта пĕр уйӑх вĕреннĕ хыççӑн салтаксем ноябрĕн 7-мĕшĕнче парадра утма тивĕçнĕ. Пӑхса тӑракансем: «Идет отличная рота Антошкина», – тесе хавхалантарса тăнă. «Учебкӑра Черноречье полигонĕнче ĕçме юрӑхлӑ шыв пĕр тĕлте анчахчĕ. Ачасем çывӑрса тӑриччен шыв тултарса килеттĕмччĕ. Чӑвашсем ĕçлеме хӑнӑхнӑ вĕт», – аса илет салтак çулĕсене Валериан Иванович.
Учебка хыççӑн салтаксене 1971 çулхи ноябрĕн 18-мĕшĕнче службăна тӑсма Германие илсе каяççĕ. Валерий 280-мĕш командӑри мотострелоксен чаçне Перлеберг хулине лекет. Çитсенех çĕлеме пĕлнине кура Марка каччине çĕвĕ машини шанса параççĕ. Вӑл ачасене бытовкăра çӳçĕсене те касса ярать. 8 уйӑх Валера полк ялавĕ умĕнче караулта тăрать. БМП-па Эльба юханшывĕ урлӑ та каçма тӳр килет салтаксен.
Тĕнче хĕсĕк тесе ахаль каламаççĕ: Валера Перлебург хулинче хĕсметре тӑнӑ вӑхӑтра хӑйсен ялĕнчи Леонид Алаевпа тĕл пулать. Вӑл Витенберг хулинче службӑра тӑнӑ. Иккĕшĕ те питĕ тĕлĕннĕ вара.
Валериан Иванович «Отличник СА» кӑкӑр паллине тивĕçнĕ, 1973 çулта ефрейтор званийĕпе яла таврӑнса «Слава» совхозра трактористра ĕçлеме тытӑнать. Тырӑ пуçтарнӑ вӑхӑтра 26 çул комбайнпа та ĕçлет. Вăл 2011 çултанпа тивĕçлĕ канура.
Мӑн Марка хĕрĕпе Галина Геннадьевнӑпа пĕрлешсе çемье çавӑрнă Валериан Шаров. Вĕсен 6 ача тата 10 мӑнук.
Екатерина Григорьева, Мӑн Марка