Хаçатра та, телевиденипе радиора та ЧР Пуçлăхĕн стипендине илекенсем çинчен час-часах асăнаççĕ. Пирĕн районта вĕсен йышĕ мĕн чухлĕ? Ăна кам илме пултарать?
Ксения БОГАТЫРЕВА, Ишлей
Валентина Александрова,Шупашкар райадминистрацин вĕрентÿ пайĕн специалисчĕ:
– ЧР Пуçлăхĕн стипендине вĕренÿре тата ĕçре пуçарулăх, çитĕнÿ кăтартакан, обществăлла ĕçсене хутшăнакан пултаруллă 14-30 çулхи çамрăксене параççĕ. Пĕлтĕр кăна 3 пин ытла çамрăк çак сумлă ята тивĕçес тесе конкурса хутшăннă, пирĕн районтан та 57 çынран 25-шĕ ЧР Пуçлăхĕн стипендине тивĕçнĕ. Пĕр çын стипендие 2 çулта пĕрре кăна илме пултарать. Кăçал ЧР Пуçлăхĕн стипендине илес текен çамрăксен октябрĕн 1-мĕшĕччен документсене тăратмалла. Вĕсем çаксем:
✔конкурса хутшăнакан ячĕпе организаци ертÿçи алă пусса çирĕплетнĕ çыру-представлени,
✔характеристика, сăн ÿкерчĕк,
✔конкурса хутшăнаканăн анкети,
✔коллектив пухăвĕнче стипенди илме тивĕçни çинчен ĕнентерекен протокол выписки,
✔паспорт копийĕ,
✔регистраци свидетельствин копийĕ,
✔зачет кĕнекин копийĕ,
✔хушамата, ята, ашшĕ ятне ылмаштарнине ĕнентерекен документсен копийĕ,
✔конкурса хутшăнакана тăратакан организацин учредительнăй документăн малтанхи страницин тата титул листин копийĕсем,
✔конкурса хутшăнаканăн заявленийĕ,
✔çитĕнÿсене кăтартакан документсен копийĕсем (юлашки 3 çулта илнĕ Хисеп тата Тав хучĕсем, ытти награда).
(Тăван Ен 35№, сентябрĕн 12-мĕшĕ, 2014 ç.)