Çăмăлттайлăх хакĕ пурнăçпа та танлашма пултарать
Çĕнĕ çул тата Раштав уявĕсене халалланă мероприятисене хатĕрленсе ирттерес ĕçсен хĕрÿ тапхăрĕнче халăха хăрушсăрлăхпа тата пулăшупа тивĕçтерекен пур службăн та сыхă тăмалла, кирек хăш самантра вырăна çитме хатĕр пулмалла. Райадминистраци пуçлăхĕ влаç органĕсен представителĕсемпе, федераци органĕсен территори уйрăмĕн ертÿçисемпе тунтикунсерен ирттерекен планеркăра çакăн пирки сăмах пычĕ.
Уяв умĕн унта та кунта фейерверксен палаткисем курăнма тытăнчĕç. Георгий Егоров вĕсене пурне те çирĕплетнĕ йĕркепе килĕшÿллĕн вырнаçтарни иккĕлентернине палăртрĕ. Районта пушар хăрушсăрлăхĕпе тивĕçтерессипе çыхăннă лару-тăрупа паллаштарнă 41-мĕш пушар чаçĕн пуçлăхĕ Сергей Краснов вĕсене надзор органĕсем тĕрĕсленине пĕлтерчĕ – йĕркене пăснине тупса палăртман. Пушар надзор ĕçĕ-хĕлĕн Шупашкар районĕнчи уйрăмĕн инспекторĕсем Ишлей ял тăрăхĕнче вырнаçнă пĕртен-пĕр клубра кăна уяв йĕркелеме ирĕк паман. Вырăнти хăй тытăмлăх органĕн ертÿçи – канашлăва хутшăннă Яков Кушев кану çуртне халăха йышăнма декабрĕн 31-мĕшĕччен хатĕрлесе çитерме шантарчĕ.
Пĕлтĕрхи уяв вăхăтĕнчи инкексем пушшех асăрханулăха çухатма юраманни пирки тепĕр хут аса илтереççĕ. Пĕлтĕр çак сăлтавпа Çĕнĕ çул уявĕсен вăхăтĕнче районăн тĕрлĕ кĕтесĕнче харăсах темиçе пушар алхаснă. Райадминистрацин ятарлă программăсен уйрăмĕн пуçлăхĕ Игорь Рябин пĕлтернĕ тăрăх çулталăк пуçланнăранпа Шупашкар районĕнче 73 пушар тухнă. Унта 3 çын вилнĕ, 4-ăн аманнă. Пĕлтĕрхи çак тапхăрта 82 пушарта 12 çын пурнăçĕ татăлнă, 6-ăн шар курнă. 2011 çултан пуçласа районта пушар алхаснă тĕслĕхсем чаксах пыраççĕ. «Çакă – профилактика тĕллевĕпе ял тăрăх ертÿçисемпе пĕрле çине тăрса ĕçленин пĕтĕмлетĕвĕ», – палăртрĕ Георгий Иванович.
Уявсен вăхăтĕнче çынсене пушар хăрушлăхĕнчен сыхлас тĕллевпе Шупашкар район администрацийĕн 2014 çулхи декабрĕн 12-мĕшĕнчи йышăнăвĕпе кăçалхи декабрĕн 31-мĕшĕнчен пуçласа 2015 çулхи январĕн 11-мĕшĕччен район территорийĕнче пушар хăрушсăрлăхĕн уйрăм йĕркине çирĕплетнĕ. Районти аварипе çăлав службисем пурте çак хушăра пысăк хатĕрлĕх режимĕ çинче пулĕç.
Вăраха тăсăлакан кану кунĕсене пăхмасăрах Георгий Иванович вĕрентÿ учрежденийĕсем патне çитмелли çула юртан тасатса тăмалли пирки асăрхаттарчĕ. Инке-синкек тухас пулсан шыв илме çырма-кÿлĕ патне çитме май çук. Пушар техники путса ларма та пултарать.
Социаллă объектсене пушар хăрушсăрлăхĕ тĕлĕшĕнчен асăрхаса тăрас тĕллевпе пурнăçланă ĕçсем çинчен райадминистрацин вĕрентÿ управленийĕн пуçлăхĕ Борис Романов, тĕп больница тухтăрĕ Владимир Дубов, «Теплоэнергосети» ООО ертÿçи Николай Елагин каласа пачĕç.
Шалти ĕçсен районти пайĕн пуçлăхĕн çумĕ Андрей Рябов мероприятисен вăхăтĕнче кашни объектрах йĕркелĕх хуралĕн ĕçченне çирĕплетнине пĕлтерчĕ. Çанталăк сивĕтнине пула урамра шăнса вилнĕ, ал-урине тăм илнĕ тĕслĕхсем унчченхи çулсенче пулман мар. Алкогольлĕ шĕвексене виçене пĕлмесĕр ĕçсен наркăмăшланасси те инçе мар. Вăлах инкек сăлтавĕ пулса тăма пултарать. Хĕрарăмсен пушшех асăрхануллă пулмалла. Эрех ĕçнĕ хыççăн туйми çывăрса пĕчĕк ачисене хĕстерсе, сывлăш çулне пÿлнĕ тĕслĕхсем республикăра пулман мар.
ТАИСИЯ КРОТОВА
Если вы нашли ошибку, пожалуйста, выделите фрагмент текста и нажмите Ctrl+Enter.