Ишлейре çĕнĕ управляющи компани ĕçе тытăнчĕ
Эрне пуçламăшĕнче райадминистраци пуçлăхĕ Георгий Егоров ĕçлĕ çул çÿревпе «Ишлейское» ЖКХ МУП-ра пулса курчĕ, унăн ертÿçипе Сергей Лукинпа тата Ишлей ял тăрăх пуçлăхĕпе Евгений Субботинпа тĕл пулса калаçрĕ. Вĕсем управляющи компани ĕçĕ-хĕлĕпе паллашса малашнехи тĕллевсене палăртрĕç.
Асăннă управляющи компани хăйĕн ĕçне нумай пулмасть пурнăçлама тытăннă – Ишлейри 16 нумай хваттерлĕ çуртсене пăхса тăма пĕлтĕр декабрь уйăхĕнче лицензи илнĕ. Маларах çак тивĕçе «Уют» компани пурнăçланă.
Георгий Иванович управляющи компанин администраци çурчĕпе паллашнă май Сергей Николаевичран паянхи лару-тăру çинчен ыйтса пĕлчĕ. «Виçĕ участок йĕркеленнĕ – ăшăпа тивĕçтерекенни, жилфонд, шывпа тивĕçтермелли тата юхтарса кăлармалли», – пĕлтерчĕ управляющи компани директорĕ.
Пухăннисем кашни участок ĕçĕ-хĕлĕпе çыхăннă йывăрлăха сÿтсе яврĕç, вăл е ку лару-тăруран тухмалли çул-йĕре шырарĕç, тăхтаса тăмасăр пурнăçламалли ĕç-хĕле палăртрĕç. «Юхтарса, тасатса кăларакан тытăм енĕпе лару-тăру еплерех?» – кăсăкланчĕ Георгий Иванович. «Салара çакăн пек 3 тытăмран пысăк вольтлă аппаратурăсен заводĕнчи кăна ĕçлет», – пĕлтерчĕ Сергей Николаевич. «Вĕсене хута яма мĕн чăрмантарать?» – калаçăва малалла тăсрĕ райадминистраци пуçлăхĕ. «Аэраторсем, электродвигатель, сывлăш вĕртермелли хатĕрсем кирлĕ, унта-кунта пăрăхсене ылмаштармалла, çутă илсе пымалла, юшкăн пуçтарăнакан шăтăксене тасатмалла», – мĕнле ĕçсем пурнăçламаллине пÿрне хуçлатса шутлама тытăнчĕç Сергей Николаевичпа Евгений Николаевич.
Пĕтĕм ыйтăва сÿтсе явнă хыççăн пухăннисем çакăн пек пĕтĕмлетÿ патне пырса тухрĕç: çын пурнăçлама пултарайман ĕç çук. Йывăрлăхсене пăхмасăрах вĕсене пурнăçламаллине йышăнчĕç пуçлăхсем. «Çĕнĕ управляющи компани килнĕренпе салари çынсен пурнăçĕ хăтлăрах пуласса шанатăп», – тĕл пулăва пĕтĕмлетрĕ райадминистраци пуçлăхĕ.
Ишлейри çĕнĕ управляющи компани салара пурăнакансен умĕнче хăйĕн тивĕçне тÿрĕ кăмăлпа пурнăçлас шанăç çук мар. Çакна унăн паянах хăйĕн ĕçĕпе ĕнентерме май пур.
ДЕОМИД ВАСИЛЬЕВ