Ноябрь уйăхĕнче пĕрлехи информаци кунĕ иртнĕ вăхăтра Атайкасси шкулĕн спортзалне кĕрсе курнăччĕ, унта юсав пыратчĕ. «Ĕçсене çĕнĕ çулччен вĕçлемелле», – хыпарларĕ ун чухне шкул директорĕ В.Д. Степанов.
Юсав ĕçĕсене кĕске вăхăтра вĕçленĕ иккен, иртнĕ эрнере ăна уçма РФ Патшалăх Думин депутачĕ А.И. Аршинова, ЧР вĕрентÿ министрĕ В.Н. Иванов, райадминистраци пуçлăхĕ Г.И. Егоров тата ыттисем хутшăнчĕç. Хĕрлĕ хăйăва касса хăнасем çĕнĕ те хитре спортзала кĕчĕç.
– Ачасене физкультурăпа, спортпа туслашма майсем туса пани питĕ пĕлтерĕшлĕ. Шанатăп, çак спортзалтах пулас чемпионсем спортра пиçĕхсе çитĕнĕç, – ачасене, вĕрентекенсене савăнăçлă пулăмпа саламласа сăмах илчĕ Алена Игоревна.
Георгий Иванович районта физкультурăпа спорта аталантарасси çине пысăк тимлĕх уйăрнине палăртрĕ. Район бюджетĕнчен асăннă сферăна укçа-тенкĕ уйăрасси çулран-çул ÿссе пырать. Сăмахран, кăçал кăна районта 3 хоккей коробки вырнаçтарнă, чылай спортзала çĕнетнĕ. Райадминистраци пуçлăхĕ ачасене спортпа туслашма, япăх йăласенчен аякра тăма чĕнсе каларĕ.
Çĕнĕ çул умĕн çакăн пек парнене тивĕçнĕшĕн вĕренекенсем, паллах, хĕпĕртерĕç. Ахальтен мар ĕнтĕ вĕсем пĕр харăссăн: «Тавах!» – тесе хыттăн хуравларĕç. Хăйсем сывă пурнăç йĕркине пăхăнма хатĕррине палăртса вара пухăннисене ташăпа савăнтарчĕç.
Аса илтеретпĕр: Атайкасси шкулĕнчи спортзала юсас ыйтупа шкулта пĕлÿ пухакан, спортпа туслă ача амăшĕ кĕркунне ЧР Пуçлăхĕ патĕнче йышăнура пулнă. Республика Пуçлăхĕ ун чухне ыйтăва татса пама шантарнă.
ЛЮБОВЬ МАН
Если вы нашли ошибку, пожалуйста, выделите фрагмент текста и нажмите Ctrl+Enter.