Юлашки вăхăтра ана çинче çум курăк пĕтерес тĕллевпе çынсем горчица вăррине акаççĕ. Çак меслет тухăçлă-и, çĕре сиен кÿмест-и?
Нина МАКАРОВА, Хыркасси
Борис НИКОЛАЕВ,Шупашкар райадминистрацин ял хуçалăх пайĕн специалисчĕ:
– Горчицăна март уйăхĕн варринчен пуçласа сентябрĕн çурричченех акма юрать. Çулса пăрахнă горчица – симĕс удобрени, тăпрана органикăпа тата гумуспа пуянлатать. Унăн тымарĕ 2-3 м тарăнăшне çитме пултарать, тăпрана кăпкалать. Ÿсен-тăранăн фитосанитари пахалăхĕсене те палăртмалла, эфир çăвĕсем хурт-кăпшанкăсене пĕтереççĕ, çĕре сыватаççĕ. Горчица çум курăкран та хăтарать. Анчах та çак ÿсен-тăранăн япăх енĕ те пур – вăл тăпрана йÿçĕтет. Тăпран пысăк йÿçĕклĕхĕ ÿсен-тăран аталанăвне япăх витĕм кÿрет. Пирĕн тăрăхри тăпра çинче çулса пăрахнă горчицăна çĕр айне тумалла мар, çиелтех хăвармалла. Ку усăллăрах та. Çĕр улми кăшт йÿçĕк тăпрана килĕштерекен культура шутне кĕрет пулсан та, хушăран ăна йĕркене кĕртмеллех. Ун пек чухне известь çăнăхĕ, вĕтетнĕ мел, йывăç кĕлĕ пулăшĕç. Горцицăна купăста ÿстернĕ тата тепĕр çул купăста лартма хатĕрленĕ йăрансем çине акма сĕнмеççĕ.
(Тăван Ен 35№, сентябрĕн 12-мĕшĕ, 2014 ç.)