Йăршу ялĕн старости Владимир Ростов тăрăшса ĕçленĕшĕн Шупашкар район администраци пуçлăхĕнчен Георгий Егоровран Хисеп хучĕ те илме тивĕçнĕ. Халăхпа ĕçлеме те пĕлмелле, пурте пултараймаççĕ.
Йăршу çыннисемшĕн иртнĕ вырсарни кун ял кунне паллă тунипе асра юлнă. Уява ирттерес тĕллевпе футбол площадкине тасатса тухнă. Вырăнĕ те илемлĕ унта, пĕр айккипе Анатолий Алексеев лартнă йывăçсем. Шăпах вĕсем айĕнче ял кунне паллă тунă та йăршусем. Чăвашсен йăлипе шÿрпе пĕçерсе сăйланнă. Уява хавас сĕм кĕртме вырăнти тата Шупашкар хулинчи ансамбльсем пулăшнă. Арçынсемпе каччăсем футбол выляса кам маттуртарах пулнине палăртнă. «Старики» тата «молодежь» командăсем туслăх çĕнтернĕ тесе йышăннă.
Нумай пулмасть йăршусене пĕр урамра çул та сарса панă. Унччен маларах кунта пурăнакансем хăйсем укçа пухса кирпĕч ванчăкĕсем, асфальт çинче юсав ĕçĕсем ирттернипе юлнă ванчăксене саркаланă. Кăçал ял тăрăх администраци йĕркеленипе хытă сийлĕ çуллă пулнă кунта пурăнакансем. Йăршусем пуласлăхра пур урамра та хытă сийлĕ çул пуласса шанаççĕ. Кăçалах ялта шыв колонкисене улăштарнă. Качакасси ялĕ патне каякан çул ик айккипе кашни çулах йывăçсем лартаççĕ ял çыннисем. Кунта чăрăшсем ÿсеççĕ, чĕрĕлменнисене, хăрса кайнисене улăштарсах тăма тăрăшаççĕ.
«Хамăршăн тăрăшатпăр, такамшăн мар. Хамăр тумасан кам туса парать?» – тет Владимир Ростов староста.
ВЕРА ШУМИЛОВА