Иртнĕ ĕмĕрте пур çĕрте те сукмаксем е лаша урапи çулĕсем кăна пулнă. Пурăна киле машина-трактор нумайланса пычĕ, лаша витисем вара пачах çухалчĕç темелле.
1961 çулта эпĕ ас тăвасса асфальт çул Шупашкартан пĕр çур çухрăм кăна тухнăччĕ. 1964 çул тĕлне Пархикасси тĕлне çиткелерĕ, пурăна киле асфальт районĕпех сарăлчĕ. Чăваш Республикинче хытă сийлĕ çул кашни ял патнех çитрĕ тесен те йăнăш мар.
Пирĕн Чăрăшкасси ял тăрăхне кĕрекен ялсене те хытă сийлĕ çул сарчĕç. Тăрăн енчисене те асфальт хурса пачĕç. «Муркаш» ятлă юхан шыв урлă Хырăш ялĕ тĕлĕнче хăтлă кĕпер хута кайрĕ. Чăрăшкасси ялĕ витĕр тухакан асфальт çула хыврĕç. Ку çул Шуркасси çумĕпе иртсе Вăрнар шосси çине тухать. Машинăсем тĕлĕнмелле хăвăртлăхпа иртеççĕ. Ял хушшине кĕрсен вĕсен хурçă урхамахĕсене кăштах чармалла та пек, анчах майĕперех çÿреме пĕлмеççĕ пулас. Урамра мĕнле хăвăртлăхпа çÿреме юранине кăтартакан паллăсем çук, «выртакан полицейскисем» те çителĕклĕ мар. Пĕр çулхине, 2013 çултаччĕ пулас, пĕр маçтăр ушкăнпа килчĕ те тем ĕçлесе хăварчĕ – ăнланмарăмăр. КАМаз прицепĕ тем пысăкăш, 15-20 тонна кĕрет пулĕ, тиенĕ асфальчĕ вара ячĕшĕн кăна. Çиçĕм хăвăртлăхĕпе ыткăнакан машинăсене чарма сахалтан та 3 çĕрте те пулин «выртакан полицейски» кирлĕ.
Ку енче 2 хутчен авари пулчĕ. Урам хушшинче проектпа тротуарсем пулмалла пулнă, анчах вĕсем çук. Çав çулпах ачасем те çÿреççĕ. Эпир, Щорс урамĕнче пурăнакансем, çул-йĕр тăвакан организацисене «выртакан полицейскисем» хурса пама тархасласах ыйтма хатĕр. Ун пирки районта та, çул-йĕр рабочийĕсемпе те сăмахланă. Ман шутпа, «выртакан полицейскисен» çÿллĕрех пулмалла – 7 сантиметрлисем мар. «Выртакан полицейскисем» тунă чухне асфальта 3 м тăршшĕ сараççĕ, питĕ сая яраççĕ, 2 метр тăршшĕ хурсан та çителĕклĕ. Ун чухне çÿллĕшне 10 см таран хăпартма май пулĕччĕ. Водительсем хăйсен кĕсье телефонĕпе калаçнă хушăрах хăвăртлăха чакармасăрах, чарăнса тăмасăрах ун урлă каçса каяççĕ — те пур çак чăрмав, те çук.
Эпир пирĕн патри çулсене йĕркене кĕртессе, ыйтнине шута илессе кĕтетпĕр, шанăçа çухатмастпăр.
ВАЛЕНТИН СИНЕЛЬНИКОВ, ЧĂРĂШКАССИ ЯЛ СТАРОСТИ