Савнă Чăваш Енĕмĕр сцена ăстисене сахал мар çитĕнтернĕ. Истори страницисенче вун-вун паллă ят çырăннă. Вĕсен йышĕнче Валерий Михайлович Семенов та пур. Нумай вăхăт Чăваш патшалăх филармонийĕн солисчĕ пулнăскерĕн вулакансене каласа памалли чылаях. Апла пуçлар-ха унпа калаçăва.
– Валерий, тăван пиччĕр, Михаил Михайлович, çулĕпе кайнăнах туйăнатăн мана. Тĕрĕсех-и?
– Тĕрĕс. Пиччен пурнăçне евĕрленине çулсем иртнĕçемĕн лайăх ăнлантăм. Çакна чылай тĕслĕх те çирĕплетет. Ача чухне пĕррехинче пичче купăс илсе килнĕ те кнопкисене пускаласа ларать, эпĕ вăрттăн сăнаса тăтăм, вăл çук чухне вара купăса ярса илтĕм те пускалама пуçларăм, ак тамаша – пулать иккен. Тепрехинче каллех пиччене сăнарăм… Çаплах купăс калама вĕрентĕм вĕт. Пичче сĕннипех музыка училищине вĕренме кĕтĕм, ун хыççăнах Хусан консерваторине кайрăм, хальхи вăхăтра акă вăл ĕçленĕ вырăнта вăй хуратăп.
– Иксĕр те пултаруллă артистсем. Çак талантăн çăлкуçĕ ăçтан тапса тăрать?
– Юрлас туртăм аттепе аннерен тытăннă. Ас тăватăп, киле хăнасем пуçтарăнатчĕç те яланах юрлатчĕç. Эпир, пĕчĕкскерсем, кăмака çинчен пăхса лараттăмăр. Чи малтан «Алран кайми аки-сухи» юрра шăрантаратчĕç. Анне юрлани халĕ те куç умĕнчех. Хальхи вăхăтри пек 2-3 куплетлине мар, 20-30 çавраллине юрлатчĕ вăл. Шел, çав юрă сăмахĕсене упраса хăварайман эпир. Пирĕншĕн çакă – пысăк çухату.
Пирĕн килте пурте юрлама ăста. Аппа урай çунă чухне те юрлатчĕ. Пĕррехинче вăл хуларан радиола тата 4 пластинка илсе килчĕ. Вĕсене кунĕпех çавăрттараттăм. «Как служил солдат» юрă питĕ килĕшнĕччĕ. Концертсенче унпа сцена çине тухаттăмччĕ, куракансен куçĕ шывланнине пĕрре мар курнă.
– Апла юрăç пулмах ĕмĕтленнĕ?
– Юрăç пуласси пирки тĕлленмен те. Пĕчĕк чухне, ял çывăхĕнче чукун çул иртнĕрен-и, тепловоз машинисчĕ пулас килетчĕ, анчах ÿснĕçемĕн шухăш-кăмăл улшăнчĕ. 7-мĕш класранпа комбайнер пулăшуçинче ĕçлерĕм, шкул пĕтерсен те ял хуçалăх отрасльне çул тытрăм, вырма вăхăтĕнче комбайнер пулăшуçинче, ытти чухне тракторпа тăрăшрăм. Темиçе хутчен те комбайнерпа иксĕмĕр районта, республикăра мала тухнă, вăл вăхăтри парнесем (радиоприемник, сехет…) халĕ те упранаççĕ. Кунта çакна та асăнса хăварас килет: 10-мĕш класс пĕтерсен юрлас туртăм пачах çухалчĕ манăн, организм улшăнăвне пула сасă çĕтрĕ. Хĕсметре вара каллех юрлама пуçларăм, мана «запевала» туса хучĕç. Ача сасси мар ĕнтĕ, арçын сасси йĕркеленчĕ – тенор.
– Ял хуçалăх сферинче ÿсĕмсемпе ĕçленĕ, çав енĕпе ятарлă пĕлÿ илес темен-им?
– Техникума механике каяс шухăш пурччĕ, анчах çав утăма тума темшĕн хăю çитереймерĕм. Пурнăçа музыкăпа çыхăнтарасси шухăшламан çĕртен пулса тухрĕ темелле. Çартан таврăнсан каллех колхозра ĕçлеме пуçларăм, пĕррехинче кĕрхи ĕçсене пĕтерсен трактор çуккипе сăлтавласа мана фермăра ĕçлеме сĕнчĕç, анчах килĕшмерĕм, «апла кай хулана» терĕç. Шантарнă çĕнĕ трактора кĕтсе илейменнипе ĕçрен тухрăм, анчах ун чухне ăçта каяссине хам та пĕлмен. Миша пичче Шупашкара музыка училищине вĕренме кĕнĕччĕ. «Кайса итлеттер сассуна», – сĕнÿ пачĕ мана. Иккĕленÿпех унта çул тытрăм. Килтĕм те итлесе тăратăп, питĕ хитрен юрлать, пăхатăп та – пичче! Ĕненмен те вăл çавнашкал пултарнине. Шиклентĕм пулин те кĕтĕмех. Мана та илме шантарчĕç…
– Музыка училищинче вĕреннипе çырлахман, малаллах ăнтăлнă…
– Тĕрĕссипе, училище хыççăн ĕçлеме каясшăнччĕ, анчах преподавательсем тата пичче ÿкĕте кĕртрĕçех.
– Консерваторире е училищере кăткăсрахчĕ?
– Паллах, консерватори – пысăк шай, профессионал пулмашкăн унта пĕлÿ илни кирлех, анчах унта йывăрлăх туйман эпĕ. Чи кăткăсси маншăн училищĕре пулнă. Мĕншĕн? Мĕншĕн тесен малтан музыка енĕпе никĕс пĕлÿ илмен. Уйрăмах 1-мĕш курсра йывăрччĕ.
– Çирĕм çул ытла филармони солисчĕ пулнă, темиçе çул ĕнтĕ преподовательте… Хăшĕ чуна çывăх: сцена çинче юрласси е ачасене пĕлÿ парасси-и?
– Сцена çинче юрлаканăн «вăл ватă» тенине илтмелле мар. Çакна тĕпе хурсах преподаватель ĕçне суйларăм. Педагогика стажĕ 8 çул кăна пулин те ачасемпе ĕçлесси кăсăклă иккенне лайăх ăнлантăм.
– Спортсменсем спортран вăхăтра каймалла теççĕ. Артистсен те сцена çинчен вăхăтра каймалла-и?
– Çапла.
– Ачасемпе ĕçлеме кăткăслăхĕн сăлтавĕ мĕнре-ши?
– Вĕсемпе ĕçлеме çăмăлах мар пулин те интереслĕ. Пытармасăр каласан, хăшĕ-пĕрин кĕвве илтеслĕхĕ-туяслăхĕ те çук. «Вĕсене мĕнле вĕрентмелле?!» – пуçа вататтăм эпĕ. «Ан пăшăрхан, кун пеккисене кăна мар пĕлÿ панă», – хуравлатчĕ пичче. Чăннипех те, тăрăшсан йăлтах пулать иккен. Хам туса çитерейменнине студентсем пурнăçа кĕртчĕр тесе эпĕ вĕсене хам тунă çитменлĕхсемпе йăнăшсенчен хăтарма тăрăшатăп.
– Вĕренекенсем мăнаçлантараççĕ-тĕр…
– Паллах. Хĕрсен ку енĕпе лару-тăру кăшт кăткăсрах, мĕншĕн тесен çемье çавăрнă хыççăн чылайăшĕн пултарулăхĕ пăчланать. Хальлĕхе çаксене асăннă пулăттăм: Сергей Петров, Андрей Думилин, Николай Ключников, Сергей Лекеров, Алена Ванеева, Роза Ильина.
Эп вĕрентнĕ студентсем «Кĕмĕл сасă» фестивальте 1-2-мĕш вырăнсене йышăннă, тĕрлĕ конкурсра хутшăнса палăрнă.
– Юрăçшăн сасăран пахи нимĕн те çук. Вăл – артистăн çăкăрĕ. Ăна мĕнле упрамалла?
– Кашни юрăç хăйĕн сассине ăнланма, ăна упрама пĕлмелле. Çавăнпа та кунта пĕр канаш пани кăна вырăнсăр. Вăхăт иртнĕçемĕн артист хăех туять ăна мĕн кирлине. Паллах, сасă гигиенине те пăхăнмалла, калăпăр, ирхине тăрсан пыра чÿхемелле, ятарлă упражненисем тумалла.
– Халĕ «çăлтăрсем» сассисене страхлаççĕ…
– Эпĕ страхламан çав. Республикăра юрăçсем кунашкал утăм туни пирки те илтмен.
– Чăваш Республикинче сасса пăхса-тĕрĕслесе тăракан специалистсем пур-и?
– Чăваш Енре сасса тĕрĕслекен специалист – фониатр – сахал. Малтан иккĕнччĕ, халĕ пĕрре кăна. Тĕрĕссипе, юрăçсемшĕн, музыка енĕпе пĕлÿ илекенсемшĕн вăл питĕ кирлĕ. Культура институтĕнче специалист пулсан лайăхчĕ, юрăçăн пырпа çыхăннă чирсене тарăна яма юрамасть. Миша пиччен сасăпа çыхăннă пăтăрмах пулсан пырне операци тумах лекрĕ. Юрать-ха, йĕркеллĕ иртрĕ. Хăш-пĕр чухне ăнăçсăр пулать, ун пек тĕслĕхсем Чăваш Енре пур. Çавăнпа та юрăçăн хăйне упрамалла, сасă янăравлăхĕ çине пыр ыратни кăна мар, сăмса сывламанни те, вар-хырăм амакĕ те япăх витĕм кÿреççĕ.
– Вăхăт иртнĕçемĕн пурнăçăра тишкерсе юрăç профессине суйласа илнĕшĕн ÿкĕнмен-и?
– Нихăçан та ÿкĕнмен. Юлашки çулсенче мана педагог ĕçĕ ытларах килĕшме пуçларĕ.
– Пултарулăх çыннисем юратăва тĕрлĕрен йышăнаççĕ, камшăн вăл – чăн-чăн туйăм, теприншĕн – ырату. Чăн-чăн туйăмсем сÿнеççĕ-и?
– Чăн-чăн юрату нихăçан та вилмест, пĕр-пĕрне хисепленипе, ăнланнипе çирĕпленме çеç пултарать.
– Юратăвăр пирки пĕлес килет…
– Шел, манăн пĕрремĕш мăшăр йывăр чире пула çамрăклах çĕре кĕчĕ, маншăн çакă пысăк çухату пулчĕ. Виçĕ çулти Алена хĕрĕм амăшĕсĕр тăрса юлчĕ… Мĕнле йывăр пулсан та вăхăт чĕре суранне сиплеме тăрăшать çав. Халĕ çемьепе пурăнатăп.
– Алена сирĕн çула суйласа илмен-и?
– Çук. Вăл урăх енчен тăрăшуллă, савăнтарать мана, халĕ мăнуксемпе хĕпĕртесе пурăнатăп.
– Пурнăçра çын валли киленĕç нумай: пĕри пулă тытма кăмăллать, тепри – вăрманта кăмпа татма… Эсĕ вара?
– Апат-çимĕç пĕçерме юрататăп, ытларах – шÿрпе, борщ, икерчĕ. Ку ĕç хĕрарăмăн, ку – арçыннăн тесе нихăçан та пайламан эпĕ. Çыннăн пурне те тума пĕлмелле.
– Кукăль пĕçеретĕн-и?
– Паллах. Чустапа аппаланма килĕштеретĕп. Чуста çăрнă чухне темĕнле киленĕç илетĕп. Сăмах май, çак пултарулăха та пиччерен илнĕ темелле.
– Пурнăçра унăн çулĕпе утни куç кĕретех. Ăна тав тăвас тесех-и «Асамат кĕперĕ» конкурс йĕркеленĕ?
– Унăн таса ячĕ яланах асра. Ăна халалласа çамрăк юрăçсен «Асамат кĕперĕ» конкурсне йĕркелерĕмĕр. Кăçал вăл 7-мĕш хут иртет.
– Тавах сана уçă калаçушăн.
Анфиса Манякова
(Тăван Ен 35№, сентябрĕн 12-мĕшĕ, 2014 ç.)