Нумай хваттерлĕ çуртсенче пурăнакансем коммуналлă пулăшушăн кĕçех икĕ квитанци илме тытăнĕç: тÿлев пĕрин тăрăх управляющи компани хыснине кĕрет пулсассăн, тепринпе – уйрăм счет çине. Çак эрнере ял тăрăх пуçлăхĕсемпе иртнĕ канашлура республикăн капиталлă юсав программи пурнăçланнине асăрхаса тăракан оператор шантаракан самантсене сÿтсе яврĕç. Ăна Шупашкар район администрацийĕн пуçлăхĕн çумĕ Зоя Маслова ертсе пычĕ.
Суйлама тивмест
Вырăнти хăй тытăмлăх управленийĕн представителĕсен ыйтăвĕсене «Капиталлă юсав» коммерциллĕ мар пĕрлешĕвĕн юридици уйрăмĕн ертÿçи Эльза Яковлева хуравларĕ.
Кунта нумай хваттерлĕ çуртсенче пурăнакансен çурт-йĕрĕн капиталлă юсав фондне йĕркелес меле сентябрĕн 28-мĕшĕччен суйласа ĕлкĕрмеллине аса илтерни вырăнлă. Юсав ĕçĕсене валли укçа-тенкĕ пухмалли меслете пĕрлехи пухура пăхса тухса протоколпа çирĕплетмелле. Вĕсем ку укçана ăçта пухса пырассине харпăрçăсем хăйсем палăртаççĕ: е ТСЖ, ЖСК ертÿçин, е регион операторĕн счечĕсем çинче.
Юсав ĕçĕсене валли укçана ятарлă счет çинче пухма йышăнсан хваттер хуçисен протоколта çавăн пекех тĕп юсав ĕçĕсене ирттерме уйăхсерен тÿлемелли виçене, вăл вара тарифпа пăхнинчен пысăкрах пулмалла мар, капиталлă юсавăн регион программинчен илнĕ ĕçсемпе пулăшусен переченьне, вĕсене пурнăçламалли вăхăтсене, счет хуçине тата ăна уçнă кредит организацине çирĕплетмелле. Пуху протоколĕсене Чăваш Республикин патшалăх çурт-йĕр инспекцине, вырăнти хăй тытăмлăх органĕн управленине çитермелле. Енчен те харпăрлăх хуçисем тĕп юсав ĕçĕсен фондне йĕркелессине хăйсем тĕллĕн суйламасан çак йышăнăва вĕсемшĕн вырăнти хăй тытăмлăх управленийĕн органĕ регион операторĕнче счет уçса 10 кунта пурнăçлать. Ку ведомство вĕсемшĕн патшалăхăн законпа пăхнă программине пурнăçлассине шантаракан мел пулса тăрать. Калăпăр, унпа килĕшÿллĕн нумай хваттерлĕ çуртра юсав ĕçĕсене 2014 çулта пурнăçламалла, РФ Çурт-йĕр кодексĕ оператора çак тĕллевпе пĕр çуртăн счече çинчен тепĕр çурт счечĕ çине куçарма ирĕк парать. Парăма кĕнĕ çурт хуçисем, паллах, хăйсен юсав фондне ăна татнă хыççăн тин укçа пухма тытăнаççĕ.
Эльза Анатольевна пĕлтернĕ тăрăх, регионри оператор ĕçĕ-хĕлĕшĕн Чăваш Республики яваплă, ведомство республикăн строительство министерствин никĕсĕ çинче йĕркеленнине палăртса хăвармалла. Çуртсенчи юсав ĕçĕсем те унăн программинче пăхнă тапхăрсенче иртеççĕ. Енчен те çуртри хваттер харпăрçисем асăннă оператор пулăшăвне хирĕç пулса фонда урăх алла парас тесен парăма татиччен вĕсен çулне икĕ çуллăх обязательство пÿлет: укçана тÿлесе татмасăр урăх оператор патне куçма ирĕк çук.
Ведомство представителĕ çавăн пекех асăннă законра улшăнусем пулсах тăрасса систерчĕ: хальлĕхе унта пур саманта та тĕплĕ виçмен-ха.
Калăпăр, çуртра тĕп юсав ĕçĕсене тин кăна пурнăçланă: подъезд алăкĕсем вĕр-çĕнĕ, çурт тăррине халĕ çеç витнĕ… Унта пурăнакансен сахалтан та 10 çул хушши юсавшăн тăкакланма тивмесси куç кĕрет. Апла пулин те харпăрçăсен программăна çав-çавах хутшăнмалла-и – ял тăрăх пуçлăхĕсене акă мĕн кăсăклантарчĕ? «Юсав фондне тытса тăмалли меле кашни çуртра пурăнакансен суйламаллине законра уçăмлăн ăнлантарнă – ку вĕсен ирĕкĕнчен килмест», – терĕ Эльза Анатольевна.
Бюджета вăя шанса планламалла
Ĕнертен вырăнти хăй тытăмлăх управленийĕсен бюджечĕсене тишкерес тапхăр пуçланчĕ. Çавна май райадминистрацин финанс пайĕн пуçлăхĕн тивĕçĕсене пурнăçлаканĕ Мария Сергеева вырăнти пуçлăхсене бюджетри укçа-тенке планланă чухне вăл кайран усă курмасăр «çакăнса тăрасран» асăрханма тимлĕ пулмаллине каларĕ. Вĕсем документацие тытса пыни районăн тĕп финансистне хальлĕхе тивĕçтермест. Çакăнпа пĕрлех вăл бюджетри укçа-тенке туллин тăкакламан ял тăрăхĕсене те асăнчĕ: Çырмапуç, Çĕньял, Сарапакасси тата Атайкасси. Патшалăх çулсен строительстви валли тата вĕсене пăхса тăма укçа-тенке çителĕклĕ уйăрнине çирĕплетекен цифрăсем те илтĕнчĕç канашлура. Çав вăхăтрах çул-йĕр фондĕнчи укçа-тенке ял тăрăхĕсенче хальлĕхе 43,3% чухлĕ кăна усă курни паллă: хăшĕ-пĕри хут ĕçне вĕçне çитермен, теприсем канашлура çак пулăшу пирки пĕрремĕш хут илтрĕç.
Çывăх вăхăтри пĕлтерĕшлĕ уявсенчен пĕри вăл – ваттисен кунĕ. Çакăнпа çыхăннă пĕрремĕш мероприяти ĕнер Çĕньял ял тăрăхĕнче иртнĕ. Райадминистрацин культура пайĕн ертÿçи Ольга Матина вĕсене кашни тăрăхрах тĕплĕ хатĕрленмеллине асăрхаттарчĕ. Кÿкеçре вăл сентябрĕн 30-мĕшĕнче иртĕ.
ТАТЬЯНА МАЙОРОВА
Если вы нашли ошибку, пожалуйста, выделите фрагмент текста и нажмите Ctrl+Enter.