Тĕп хулара лавккара черетре тăнă май пĕр ÿсĕр çын сутуçа кÿрентерсе тĕрткелешме пуçланине куртăм. Харкашу темпе те вĕçленме пултарĕччĕ те, анчах бронежилетлă, каскăллă, пăшаллă çынсем кĕтмен çĕртен кĕрсе тăрсан ÿсĕр арçын туххăмрах лăпланчĕ. Ăçтан тата мĕнле майпа çакăн пек хăвăрт килсе çитеççĕ-ха çав салтаксем? Шупашкар районĕнче унашкал çăлавçăсем пур-и? Вĕсене ăçта хатĕрлеççĕ? Мăнука çакăн пек професси суйлама сĕнсе пăхасшăн.
Виталий АФИНОГЕНТОВ, Кÿкеç поселокĕ
Василий ВАСИЛЬЕВ,ведомство тулашĕнчи хуралăн Шупашкар районĕнчи уйрăмĕн инспекторĕ:
– Эсир калакан «çăлавçăсем» – ведомство тулашĕнчи хурал ĕçченĕсем. Ку орган патшалăхăн вăй тытăмĕ шутланать. Ятарлă техникăллă çак хурал йышăнăва хăвăрт тăвакан, тĕплĕ хатĕрленнĕ, аттестациленнĕ, хĕç-пăшаллă специалистсенчен тăрать. Ведомство тулашĕнчи хуралăн тĕп тĕллевĕсенчен халăх хушшинче хăрушсăрлăха сыхлассине, тĕрлĕ пĕлтерĕшри объекта сăнавпа тивĕçтерессине асăнма пулать. Кунашкал служба Шупашкар районĕнче те пур. Вăл Кÿкеçри Советская урамри 12-мĕш çуртра вырнаçнă. Хурала чĕнсе илме кнопкăна пусни те çителĕклĕ, уйрăм тĕслĕхре çакă пĕрле илсе çÿремелли брелок та пулма пултарать – пĕтĕмпех килĕшÿре палăртнă самантсенчен килет.
Çак тытăм службине кĕрес текенсен сывлăх, ÿт-пÿ хатĕрлĕхĕ тĕлĕшĕнчен тивĕçтермелле, шалти ĕçсен органĕнче тăракансен тивĕçне пурнăçлама пултармалла. 35 çултан аслăрах марри тата судпа айăпланманни – тĕп услови.
(Тăван Ен 35№, сентябрĕн 12-мĕшĕ, 2014 ç.)