Утă уйăхĕн 6-мĕшĕнче Мускаври ВДНХра чăваш Акатуйĕ иртет. Акатуй культура, наци апат-çимĕçĕн тата спорт мероприятийĕсене пĕрлештерет. Чăваш кĕрешĕвне хутшăнакансем те йăлана кĕнĕ турнира пухăнаççĕ.
Мускавра Акатуя 1930 çултанпа ирттерме тытăннă. Тĕп хулари уяв юлашки çулсенче анлăрах иртме пуçларĕ. 2023 çулта ăна «Сокольники» паркра йĕркеленĕ. Пĕлтĕр ВДНХра иртнĕ Акатуй 165 пин ытла çынна пухнă. Йĕркелÿçĕсем кăçалхи уяв Мускавра пурăнакан ентешсемпе регион хушшинчи çыхăнăва тата ытларах çирĕплетме май парасса шанаççĕ.