АСТĂВĂМ
Нарăс уйăхĕн 15-мĕшĕнче Совет çарĕсене Афганистанран кăларнăранпа 36 çул çитрĕ. Вунă çула (1979-1989) тăсăлнă вăрçăра унăн вут-çулăмĕ витĕр миллион ытла çын тухнă, 15 пин салтак пуçне хунă. Чăваш Енрен унта тăватă пин çурă салтак пулнă, 119-шĕ каялла таврăнайман. Шупашкар тăрăхĕ хаяр вăрçăра 8 каччăна çухатнă.
Çĕршыв пурнăçĕнчи çак синкерлĕ тапхăр манăçа тухмасть, вăл халĕ те чикĕ леш енче çапăçнă ветерансене, унтан таврăнайман салтаксен ашшĕ-амăшне, çывăх çыннисене хăй çинчен аса илтерсех тăрать. Кашни çулах нарăс уйăхĕнче çак кунсенчсе Афган вăрçине хутшăннă салтаксем пĕрле пухăнаççĕ, тĕлпулусене хутшăнаççĕ, паттăрлăх урокĕсем ирттереççĕ.
