Сентябрĕн 19-мĕшĕнче, Атăлъял ялĕнчи клуб патĕнчен пуçласа Рыбацкий урам таран çул тума пуçларĕç. Унăн тăршшĕ 750 метр пулать. Çул тăвас ĕçсене ялта пурăнакан Сергей Борисов ертсе пырать. Чи малтанах çырма урлă каçакан çула 2 экскаваторпа 40 см таран чавса тарăнлатрĕç. Экскаваторсем çинче пирĕн район çыннисемех тăрăшаççĕ: Çĕньялти Николай Тумакинпа Митрофанкассинчи Александр Егоров (сăн ÿкерчĕкре). Тепĕр кунне хăватлă КамАЗпа Шупашкар каччисем – Михаил Королевпа Семен Григорьев – çул çине хăйăр турттарчĕç. Пĕтĕмпе 32 машина таран пулчĕ. Сентябрĕн 22-мĕшĕнче хăйăр куписене танлаштарса çул çине сарчĕç. Ун хыççăн вак чулпа гравий сарса якатасшăн çул тăвакансем. Малалла çул тăвас ĕçсем урам хушшине куçаççĕ. Çанталăк уяр тăрасса, çула вăхăтра туса пĕтерсе хута ярасса чăтăмсăррăн кĕтеççĕ пирĕн урам çыннисем.
НИКОЛАЙ ВАСИЛЬЕВ, АТĂЛЪЯЛ