Федераци канашне янă Çырăва Раççей Президенчĕ Владимир Путин çар çыннисене тав тунинчен пуçларĕ. «Тĕнчери терроризма хирĕç кĕрешекен çар çыннисене тав сăмахĕ каланинчен пуçласшăн эпĕ Çырăва. Паян Георгиевски, çар мухтавĕн, залĕнче çар летчикĕсем, çар çыннисем, Сирири терроризма хирĕç кĕрешекенсем пухăннă. Мăшăрĕсене çухатнă Гелена Пешкова, Ирина Позынич та кунта килме вăй-хал çитерчĕç, таймапуç сире тата паттăрсен ашшĕ-амăшне», – терĕ Владимир Путин. Вĕсене асăнса пурте ура çине тăрса шăпланчĕç.
Малалла сăмах терроризм пирки пулчĕ. Унăн хăрушлăхĕ вăйланса пынине палăртрĕ Президент: «Тĕнчери терроризма пĕр патшалăхăн вăйĕпе кăна çĕнтерме çук, уйрăмах çĕршывсен чиккисем уçă пулнă тата террористсем яланах укçа-тенкĕ енчен пулăшу илсе тăнă вăхăтра». Унтан ытти тема çине куçрĕ патшалăх ертÿçи. Вăл палăртнă тăрăх, Раççейре суйлав умĕнхи конкуренци уçă та тĕрĕс пулмалла, çав вăхăтрах суйлавçăсене хисеплемелле. Паллах, экономика лару-тăрăвĕ пирки асăнмасăр пултараймарĕ вăл. «Çĕршыври экономикăра кăлтăксем пур, анчах та лару-тăру питĕ йывăр тесе калама çук», – калаçрĕ Президент. Асăннă сферăра ырă самант пулнине те асăнчĕ. «Анчах та çакă лăпланмаллине тата нефть хакĕ ÿсессине кĕтсе лармаллине пĕлтермест, пирĕн кирек мĕнле лару-тăру сиксе тухасса та хатĕр пулмалла», – çавăнтах хытарса каларĕ Президент. Хальхи вăхăтра строительствăра, автомобиль тăвакан тата çăмăл промышленноçра йывăрлăхсем пур, вĕсене пулăшу памаллах – çакна та асăнчĕ Владимир Путин. Çырури тепĕр самант – вĕрентÿ пирки. Вăл пĕлтернĕ тăрăх, шкул ачисен пĕлÿ шайне ÿстермелле, çĕнĕ вĕренÿ вырăнĕсем тумалла, шкулсем хăпартмашкăн тата вĕсене юсамашкăн 50 млрд тенкĕ таран укçа-тенкĕ уйăрмалла.
Çырура ял хуçалăх пĕлтерĕшлĕ çĕрсем пирки те пулчĕ сăмах. «Тĕллевлĕн усă курман ял хуçалăх пĕлтерĕшлĕ çĕрсене каялла тавăрмалла та аукционсем йĕркелесе вĕсемпе ĕçлеме пултаракансене сутмалла. Миллион гектар çĕрсене çаврăнăша кĕртмелле», – терĕ вăл юлашки çулсенче татса памалли ыйтусен шутне кĕнĕ темăна каллех хускатса. Унтан вун-вун çемье шанăçпа кĕтнĕ хыпар илтĕнчĕ – амăш капиталĕн программине Президент малалла тăсма сĕнчĕ. «Демографи «шăтăкне» пĕтермешкĕн эпир туни кăна çителĕксĕр. Паллах, вăл бюджетшăн йывăр, çавăнпа та виçсе хакларăмăр, тÿлеме пултаратпăр-и, пултаратпăр, нимĕнле çивĕч ыйтусене пăхмасăр», – ача çуратма планлакан çемьесене шанчăк пачĕ Раççей Президенчĕ. Асăннă программăн ырă çимĕçне нумай çемье хăй çинче туйса курчĕ ĕнтĕ, иккĕмĕш, виççĕмĕш ача çуратакансем йышланчĕç. Çĕршывра виççĕмĕш çул ĕнтĕ халăх шучĕ хăй тĕллĕн ÿссе пыни паллă. Юлашки çулсенче çынсем те ытларах пурăнма пуçланă. 2016 çул тĕлне кăтарту 71 çултан та иртет.
Раççей Президенчĕ Федераци канашне янă Çырăва ЧР Пуçлăхĕ, район ертÿçисем, тĕрлĕ сферăра тăрăшакансем сенкер экранпа тимлесех итлерĕç. Вĕсен шухăш-кăмăлне те пĕлер-ха апла. ЧР Пуçлăхĕ Михаил Игнатьев Çырăва вуланă çĕре хăех хутшăнчĕ. Акă мĕн пĕлтерчĕ вăл каярах: «Раççей Президенчĕ тĕнчери тата çĕршыври политика ыйтăвĕсене пĕрремĕш вырăна кăларни ахальтен мар, ку Раççейри кашни çынна канăçсăрлантарать. Владимир Путин: «Мĕн тумаллине – эпир пĕлетпĕр», – тени пирĕн шанăçлăха тата та ÿстерет. Президент малашне аталанмалли çул-йĕре палăртрĕ. Пирĕн тĕп тĕллев – предпринимательсен йышне, потребитель рынокĕнче хамăр патăрта туса кăларнă тавар шутне ÿстересси». ЧР Пуçлăхĕ палăртнă тăрăх, социаллă пурнăçри пĕтĕм тивĕç малтанхи пекех пурнăçланĕ: шкулсем çĕкленĕç, 2016 çулта вĕсем валли федераци бюджетĕнчен укçа-тенкĕ уйăрма пăхса хунă ĕнтĕ, 50 ФАП та хута кайĕ. «Владимир Путин палăртнă тĕллевсем пурнăç пахалăхне ÿстермелли хушма çул-йĕрсем тупма хавхалантарать пире», – пĕтĕмлетрĕ Михаил Игнатьев.
Райадминистраци пуçлăхĕ Георгий Егоров вĕрентÿ сфери пирки сăмах пуçарчĕ. Район бюджечĕн пысăк пайĕ вĕрентÿ тытăмне каять. «Кăçал, юлашки 20 çулта пĕрремĕш хут, Янăшра çĕнĕ шкула хута ятăмăр. Вĕсене тăвас тата юсас ĕç районта малалла тăсăлĕ. Çулсеренех сахалтан та икĕ спортзала юсатпăр. Шкулсенчи 17 класра математика тата естествăлла наука профилĕсем пурнăçа кĕреççĕ. Сăмахран, Кÿкеç лицейĕнче робототехника занятийĕсем ирттермешкĕн вĕрентÿ лабораторийĕпе усă кураççĕ. Ултă шкулта кадет класĕсем пур», – палăртрĕ вăл.
«Стройсервис» ООО директорĕ Анатолий Илларионов В. Путин строительство тытăмне пулăшу памалли темăна аталантарса калаçрĕ. Унăн шухăшĕпе, вырăнта туса кăларнă строительство материалĕсемпе усă курмалла, çапла туни стройкăн, юсав ĕçĕсен хакне чакарма, çав вăхăтрах пахалăхне пысăклатма пулăшĕ. Кунпа муниципалитетсем те интересленмелле, патшалăх тата муниципалитет заказĕсене пысăклатни вырăнта тавар тăвакансене аталанма, ĕç вырăнĕсене сыхласа хăварма пулăшĕ.
