Пĕтĕм тĕнчери аннесен кунĕ çывхарать. Анне юратăвĕ иксĕлми теççĕ халăхра. Çав юратăва пирĕн яланах чĕрере тытасчĕ, аннесене уяв кунĕсенче анчах мар, кашни кун ăшă сăмахсем калама манас марччĕ.

Анне – хĕвел пек, уйăх пек – çĕр çинче пĕрре. Уйрăмах аслă ăрури аннесем пирĕншĕн тĕслĕх пулса тăраççĕ, вĕсен пурнăçĕ нихăçан та çăмăл пулман. Вăрçă вăхăтĕнче терт-нуша курнине вĕсем нихăçан та манмаççĕ. Паянхи кун та аннесем алă усса лармаççĕ, вăй çитнĕ таран тăрăшаç­çĕ, пахчара ĕçлеççĕ, ачисене те пулăшаççĕ, мăнукĕсемпе, кĕçĕн мăнукĕсемпе савăнаç­çĕ. Вăрçă вăхăтĕнче ырми-канми ĕç­ленĕ тыл ĕç­ченĕсем-аннесем кашни ялтах пур, шел те, вĕсем çулсеренех сахалланса пыраççĕ.

Манăн тĕрленчĕк хуçи – Янашкасси ялĕнче çуралнă, паянхи кун та çакăнтах пурăнакан, декабрĕн 3-мĕшĕнче 90 çул тултаракан Нина Егоровна Иванова. Вăл хресчен çемйинче çуралнă. Ашшĕ, Егор Николаевич Иванов, Нина 3 çулта чухне çĕре кĕнĕ. Амăшĕ, Евдокия Захаровна, ăна пĕччен ÿстернĕ, пĕчĕк хĕрача ашшĕн юратăвне, хÿтлĕхне курайман. Мĕн пĕчĕкрен амăшĕнчен ĕçе хăнăхса пынă, çĕр çинче вăл тума пĕлмен ĕç çук та пулĕ. Шăмăш шкулĕнче 7 класс пĕтернĕ те мĕн пенсие тухиччен колхозра, совхозра ĕçленĕ.

Вăрçă вăхăтĕнче Етĕрне хули çывăхĕнчи Сăр шывĕ патĕнче окоп чавнă, Атăл леш енче торф кăларнă, вăрман каснă, сухăр юхтарнă. 1942 çулта Кÿкеç­ри МТСра трактористра, унтан Канашри механизаторсен шкулĕнче вĕреннĕ. «СТХ», «ХТЗ» тракторсемпе 1946 çулччен ĕçлерĕм» – аса илет халĕ ветеран, – манăн плугарь Арккасси ялĕнче пурăнакан Мария Николаевнăччĕ, çĕрне-кунне пĕлмесĕр ĕçленĕ вăл вăхăтра».

Çакăн пек ĕç­чен те хитре хĕре ял каччи Валентин Иванов куç хывнă. 1946 çулта çамрăксем çемье çавăрнă. Нина фермăра, мăшăрĕ слесарьте ĕçленĕ. Çемьере 4 ача çуралнă (2 ывăлпа 2 хĕр), пĕр хĕрĕ пĕчĕклех, аслă ывăлĕ 5 çул каялла çĕре кĕнĕ. Ачасене çухатни амăшĕшĕн нихăçан та чĕререн тухмасть. Мăшăрĕ те чире пула Нина Егоровнăран пĕр 20 çул каялла уйрăлса кайнă.

Темле пулсан та пурнăç малаллах пырать. Нина Егоровна ялта хисеплĕ çын, питĕ кăмăллă асанне. Халĕ те килте пĕчченех пурăнать. Ывăлĕ Кир çемйипе Шупашкарта, хĕрĕ Зоя Мошкассинче пурăнаççĕ, амăшĕ патне килсех çÿреççĕ, 6 мăнукĕ те ватă çыннăн кĕтнĕ тĕпренчĕкĕсем.

Нина Егоровна тыл тата ĕç ветеранĕ, орденсемпе медальсем те пур. Çак çула çитнĕ пулсан та ялти культура çуртне те çÿреме ÿркенмест, кунта ирттерекен мероприятисене хутшăнма тăрăшать. Аннесем сывă чухне вĕсене хисеплеме ан пăрахăр.

Ксения Михайлова, арккасси