Апаш культура çурчĕ çумĕнчи драма кружокĕ халăх театрĕ ятне 1994 çулта тивĕçнĕ. Артистсем калăпланă спектакльсене районти ялсенче пурăнакансем çеç мар, республикăри ытти район çыннисем те курса киленеççĕ.
Акци ячĕпе
Февралĕн 20-мĕшĕнче Апаш халăх театрĕ сцена çине «Çулсем иртсен, кунсем юлсан» премьерăпа тухнă. Пьеса авторĕ Апаш ял тăрăх çынни – Владислав Кириллов. Вăрçă темипе çырнă пьесăна артистсем хăйсен ял тăрăхĕнче кăна мар, «Çĕнтерÿ – 70 ырă ĕç» акцие хутшăнса Çырмапуç, Чăрăшкасси, Çĕньял-Покровски
Шанăç пĕтмен
Спектакльте икĕ ăру çыннисен çыхăнăвĕ сăнланнă. Тăван çĕршывăн Аслă вăрçи чарăннăранпа 70 çул çитет пулин те вăрçă ахрăмĕ паян кун та сисĕнет. Вăрçă пуçлансанах чăваш ялĕнчи Марье хăйĕн юратнă çыннине Виталие тăшмана хирĕç çапăçма ăсатать. Анчах кĕтсе илеймест… Кăшт вăхăт иртсен юратнă çынни вăрçăра çухални çинчен хыпар илет. Виталипе Марье хĕрĕ ашшĕне нихăçан та тĕл пулаймасть. Хыпарсăр çухалнине пĕлсен те Марье юратнă çыннине кĕтме пăрахмасть, Тăван çĕршывăн Аслă вăрçи чарăннăранпа 70 çула яхăн иртет пулсан та унăн чĕринче Виталие курас шанчăк упранать. Савнисем хăй вăхăтĕнче лартнă хурăн йывăççи те ăна шанăç, вăй-хăват парса тăрать…
Хальхи вăхăт. Салтака кайма пуçтарăнакан ялти яш – Петĕр – хăйĕн юлташ-хĕрĕн Аньăн кукамăшĕн хуйхине чĕре патне илсе пулăшма тăрăшать. Интернет урлă аякри Америкăра пурăнакан Виктора шыраса тупать. Виктор, Тăван çĕршывăн Аслă вăрçине хутшăннăскер, тăшманпа çапăçнă чухне хытă аманать, тăнне çухатать. Тăна кĕрсен те вăл хăй кам пулнине аса илеймест. Шăпа ăна аякри Америкăна илсе çитерет. Унта вăл хăйĕн пурнăçне ирттерет. Вăрçăччен савнă тусĕпе çапăннă сăн ÿкерчĕк кăна иртни çинчен шухăшлаттарать, анчах Виктор нимĕн те аса илеймест. Интернет пулăшнипе Виталие(вăлах Виктор) шыраса тупаççĕ.
Хапăл туса йышăннă
Пьесăна ĕненмелле калăпланă артистсем çаксем – Мария Иванова (Марье), Аня (Елена Смородинова), Петĕр (Сергей Смородинов), Мирун (Владислав Кириллов), Кĕтерук (Елена Федорова), Таиç (Елена Степанова). Спектакле кун çути кăтартма халăх театрĕн ертÿçи Ольга Ерилеева та нумай вăй хунă. Сăнара ĕненмелле калăпласси çăмăл ĕç мар. Декорацисем хатĕрлекенĕ – Владимир Борисов, музыкăпа илемлетсе пыраканĕ – Виталий Смородинов. «Çулсем иртсен, кунсем юлсан» спектакльте шкул ачисем те хутшăннă. 5-мĕш класри Анастасия Васькинăпа 8-мĕш класра вĕренекен Светлана Семенова вăрçă темипе çырнă сăвăсене куракан чĕрине тивмеллех вуланă.
Вăрçă ахрăмĕ нумай çул иртсен те хăйĕн çинчен манма памасть. Мăшăрĕсене, юратнă çыннисене тăван çĕршыва хÿтĕлеме ăсатнă хĕрарăмсем усал хыпара ĕненмесĕр куç хупичченех лешсем каялла таврăнасса кĕтеççĕ, шанăçне çухатмаççĕ. Юрату вăй-хăвачĕ шанчăк парса тăрать, кĕтни кăлăха каймасть – Марье юратнă çынни унпа пĕр çĕр çинчех çÿренине пĕлет, вăл чĕрĕ-сывă пулни уншăн çав тери пысăк телей.
Пьеса авторĕ Владислав Кириллов каланă тăрăх, спектакле пур çĕрте те халăх хапăл туса кĕтсе илнĕ. Ăна çак пьесăна çырма ывăлĕ салтака кайма хатĕрленни, телевизорпа «Ищу тебя» передачăсене куркалани хавхалантарнă. «Ку манăн хам тĕллĕн çырнă пĕрремĕш пьеса. Спектакле çынсем хапăл туса йышăнчĕç, куççуль шăлакансем те пулчĕç», – пĕлтерчĕ Владислав Петрович.
ВЕРА ШУМИЛОВА
