Чăваш Ен Пуçлăхĕ Михаил Игнатьев республикăн Патшалăх Канашне яракан Çырăва хатĕрлес енĕпе ĕçсем малалла тăсăлаççĕ. Ку документра Правительство, Патшалăх Канашĕ, вырăнти хăй тытăмлăх органĕсем, предприятисемпе организацисем малашлăхри çул-йĕре палăртĕç.
Çырăва хатĕрленĕ май республикăра пурăнакансен, общество организацийĕсен, граждан обществин ытти институчĕн сĕнĕвĕсене тĕпе хураççĕ. Халăхăн пурнăç пахалăхне ÿстерме чи малтанах мĕн тумалла? Влаçсен халăхран тухакан мĕнлерех ыйтусем çине çаврăнса пăхмалла – кăна шăпах çав сĕнÿсем тăрăх ăнланма май пур.
Сĕнÿсене çак адреспа йышăнаççĕ: Чăваш Республики, Шупашкар хули, Президент бульварĕ, 10-мĕш çурт; e-mail, pres0@cap.ru – «Çырăва хатĕрлеме».
Чăваш Ен Правительствин тĕп тĕллевĕсенчен пĕри – халăха сывă пурнăç йĕркине пăхăнма хăнăхтарасси. Тутаркасси вăтам шкулĕнче вĕренекен Святослав Петров Çырăва хатĕрлеме тÿпе хывас тĕллевпе республика Пуçлăхĕ патне çитернĕ сĕнÿре çакна валли чи малтанах халăха эрех-сăраран пистермеллине палăртнă. Автор унта «урăлăх» термина та ăнлантарнă – «этем табакпа, наркотикпе, туртмалли хутăшсемпе, эрех-сăрапа кирек мĕнле дозăпа хăйне-хăй наркăмăшланассине программăласран ирĕклĕ пулни». Вун пĕрмĕш класс вĕренекенĕ шкул психологĕ ирттернĕ урăлăх урокĕсене, шкултан килмен сăлтавсемпе пăрахăçланăскерсене, ырăпа асăнать. Ун шухăшĕпе, вĕсем профилактика мероприятийĕсенчен те усăллăрах пулнă-мĕн.
Халăх сывлăхне сыхлас ыйтусем чăннипех те çивĕчлĕхне çухатмаççĕ. Шорккара пурăнакансем акă хăйсен сывлăхне асăрхаса тăракан фельдшер çуккишĕн пăшăрханаççĕ. «Çĕнĕ, хăтлă ФАПăн лайăх тухтăр пулмасан усси сахал», – теççĕ вĕсем.
Тутаркассисене сипленме Кÿкеçе çÿресси хăратать. «Участокри сиплев учрежденине хупасси пирки юлашки вăхăтра питĕ нумай калаçрĕç. Ачасемпе поселока сипленме çÿреме питĕ кансĕр пулĕ», – терĕ хăйĕн ятне хаçатра кăтартма килĕшмен нумай ачаллă амăшĕ.
Ыйтусемпе шухăшсене вулакансенчен «Тăван Ен» редакцийĕ 8(83540)2-12-59 телефон номерĕпе йышăнать.
