ЧР Патшалăх Канашĕн çак эрнере уçăлнă черетлĕ вăтăр иккĕмĕш сессийĕнче виçĕ теçеткене яхăн ыйту пăхса тухнă. Çапах та чи пĕлтерĕшли Республикăн Министрсен Кабинечĕн Председательне Иван Моторина çак должноçа çирĕплетессипе çыхăннă пулнă.

Вăл çакăн умĕн парламентари фракцийĕсемпе курнăçнă, «Единая Россия» фракци членĕсемпе тĕл пулнă.

Премьер-министр должноçне çирĕплетмешкĕн ирĕк пама сĕнекен Иван Моторинпа ЧР Пуçлăхĕн Администрацийĕн ертÿçин тивĕçĕсене пурнăçлакан Юрий Васильев паллаштарнă. Вăл хăй вăхăтĕнче Экономика аталанăвĕн министерствине ертсе пынă, унтан – Правительствăна. Хальхи вăхăтра та премьер тивĕçне пурнăçлать, Владимир Путин Президент çумĕнчи управлени кадрĕсен резервĕнче тăрать. Правительствăн юлашки çулсенчи ĕçĕпе паллаштарнă май чылай енĕпе ÿсĕм тума май килнине палăртнă. Промышленноçра ку кăтарту 145% иртнĕ (Раççейри вăтам ÿсĕм – 119%). Паян Чăваш Енре предпринимательлĕхĕн 49 пин субъекчĕ ĕçлет, вĕсем ĕçлекен йышăн 37% ĕçпе тивĕçтереççĕ. Пурăнмалли тăваткал метрсене çаврăнăша кĕртес, çулсем тăвас, ял хуçалăх таварĕ туса илес енĕпе ÿсĕм пуррине вăл конкретлă цифрăсемпе çирĕплетнĕ. Малашлăхра пурнăçламалли плансем те пысăк. Çитес пилĕк çулта Правительствăн Чăваш Ене 250 млрд тенкĕ инвестици илĕртмелле. Çапла вара 2020 çул тĕлне промышленноç производствин калăпăшĕ 18% таран ÿсмелле. Çак тĕллевпе Иван Борисович индустри паркĕсем пулăшасса шанать. Вĕсем сахалтан та виççĕрен кая мар пуласси паллă. Пĕрремĕшне çулталăк каялла хута янă, теприне тума пуçланă. Çурт-йĕр строительствинче вара Иван Моторин экономкласс йышши хваттерсен строительствине аталантарасшăн. Республикăра ача сачĕсем çĕклессипе çыхăннă программа ăнăçлă вĕçленсе пырать, çитес çулсенче вара 17 шкул хута кайĕ.