Çĕньял-Покровски ял тăрăхĕнче пурăнакан вун-вун ачашăн июнĕн 1-мĕшĕ чăн-чăн савăнăç кунĕ пулса тăчĕ. Çĕньял-Покровски шкул территорийĕнче ача-пăча спорт площадки, Мăн Кивпулăх ялĕнче вара вăйă площадки вĕсене йышăнма тытăнчĕç.

Ачасене хÿтĕлемелли кун Пархикасси клубĕ умĕнчи флэшмобпа – кĕвĕ-çемĕпе зарядка тунипе – пуçланса малалла концертпа, вăйăсемпе тăсăлчĕ. Çуллахи каникул пуçланнă ятпа хĕрачасемпе арçын ачасене саламлама райадминистраци пуçлăхĕ Георгий Егоров килчĕ, çуллахи уйăхсене усăллă ирттерме лайăх кăмăл сунчĕ.

Уява ачасен ашшĕ-амăшĕ, кукашшĕ-кукамăшĕ, аслашшĕ-асламăшĕ те килнĕ. Ачасене хÿтĕлемелли кун вĕсемшĕн уяв саманчĕ кăна-ши? Çакна хăйсенченех ыйтас терĕмĕр. Июнĕн 1-мĕшĕ вĕсемшĕн чăннипех те пĕлтерĕшлĕ кун иккен. «Ачасене пирĕн чи лайăххине кăна памалла, вĕсене усалтан – наркотикпе, алкогольпе айкашассинчен, пирус туртассинчен, преступлени çулĕпе каяссинчен – сыхламалла. Вĕсене физкультурăна ытларах явăçтармалла, компьютер умĕнче çеç ан ларччăр», – шухăшне пĕлтерчĕç кукамăшĕ-асламăшĕсем. Мăнукĕсем яланах тĕрĕс-тĕкел çÿреччĕр тесе Пархикасси ял библиотекин ертÿçи Галина Мочалова вĕсене «Амăшĕн кĕллин» сăмахĕсене çырнă хут листисене валеçсе пачĕ.

Çĕньял-Покровски шкулĕн картишĕнчи площадкăна официаллă уçмашкăн Георгий Егоровпа пĕрле ачасем те хутшăнчĕç. «Кунта сирĕн вăхăта усăллă ирттермелле пултăр», – терĕ райадминистраци пуçлăхĕ. Çакна ачасем тахçанах кĕтнĕ тейĕн, хĕрлĕ хăйăва каснă-касманах турниксем çине хăпарса кайрĕç.

Çакăнти спорт площадкине вырнаçтармашкăн 167 пин тенкĕ тăкакланă. Пĕлтĕр шкул 110 çул тултарнине халалласа Çĕньял-Покровски ял тăрăх администрацийĕ 70 пин тенкĕ уйăрнă, ытти – спонсор пулăшăвĕсен шучĕпе.

Юлашкинчен Георгий Егоров ашшĕ-амăшĕпе тата педагогсемпе тĕл пулчĕ. Каникул вăхăтĕнче ачасен хăрушсăрлăхĕ пирки пулчĕ калаçу. Шывра путасран, çул çинче тата ытти çĕрте инкеке лекесрен сыхă пулмалли пирки тепĕр хут асăрхаттарчĕ пуçлăх.

ЛЮБОВЬ ГОРОДИЩЕНСКАЯ