Ытти муниципалитетсенче те вĕсене палăртас ĕçсем вĕçленсе пыраççĕ
Вăрман-Çĕктер ял тăрăхĕн виççĕмĕш созыври Депутатсен пухăвĕн черетсĕр 2-мĕш ларăвĕ ноябрĕн 2-мĕшĕнче пăхса тухнă 3 ыйтуран чи пĕлтерĕшли пĕрремĕшĕ пулчĕ. Шăпах вăл ял тăрăх пуçлăхне çирĕплетессипе çыхăннăччĕ. Конкурс комиссийĕн председателĕн тивĕçĕсене пурнăçланă ял тăрăх Депутачĕсен пухăвĕн председателĕ Вячеслав Спиридонов пĕлтернĕ тăрăх, хăйĕн кандидатурине çак должноçе тăваттăн сĕннĕ: Александр Кудряшов, Александр Фадеев, Аверкий Михайлов, Олег Ерманов. Комисси ларăвне çавăн пекех райадминистраци пуçлăхĕ Георгий Егоров, райадминистрацин вĕрентÿ пайĕн пуçлăхĕ Борис Романов, Шупашкар районĕн Депутатсен пухăвĕн депутачĕ Леонид Захаров, Вăрман-Çĕктер ял тăрăх Депутатсен пухăвĕн депутачĕ Людмила Горшкова, Вăрман-Çĕктерти ветерансен Канашĕн ертÿçи Мария Изванова тата Татьяна Суманова администраци специалисчĕ хутшăнчĕç.
Комисси ларăвне собеседовани майĕпе ирттернĕ, кашни кандидатăн ял тăрăхĕн пилĕк çуллăх аталанăвне сăнласа памалла пулнă. Комиссин кашни членĕ кандидатсене хăйне май хакласа балсем лартнă. Конкурс пĕтĕмлетĕвĕпе Олег Ерманов ыттисенчен уйрăмах пысăк кăтарту – 161 балл – пухса çĕнтернĕ. Комисси ларăвĕн йышăнăвĕшĕн Вăрман-Çĕктер ял тăрăхĕн Депутачĕсенчен 8-шĕ «майлă» сасăларĕ. Çапла вара малашне Вăрман-Çĕктер ял тăрăхне Олег Ерманов ертсе пырĕ. Вăл пухăннисене хăйĕнпе кĕскен паллаштарчĕ: «43 çулта. Тĕп хулари заводра рабочи должноçĕнче тăрăшатăп. ЧПУ истори факультетне пĕтерсе аслă пĕлÿ илнĕ. Икĕ ача пур: ывăлпа хĕр. Хĕрĕ Инга Мускаври институтра 4-мĕш курсра, ывăлĕ Игорь 9-мĕш класра вĕренет. Мăшăрĕ Надежда Хыркассинчи амбулатори уйрăмĕнче врач-педиаторта тăрăшать. Çемьепе Вăрманкассинче пурăнатăп». Çĕнĕ ертÿçĕ шанăçа тÿрре кăларма халăхпа пĕрле тăрăшса ĕçлеме хатĕррине пĕлтерчĕ.
Сăмах май
Çак эрнере çавăн пекех ытти ял тăрăх администрацисенче те пуçлăхсене çирĕплетес тĕлĕшĕпе Депутатсен пухăвĕсем иртнĕ. Çĕньял ял тăрăхĕн пуçлăхĕ улшăнман – Евгений Зубков. Апаш ял тăрăх пуçлăхĕ Александр Владимиров, Чăрăшкасси ял тăрăх пуçлăхĕ Виталий Павлов, Кăшавăш ял тăрăх пуçлăхĕ Сергей Мульдияров, Ишек ял тăрăх пуçлăхĕ Анатолий Максимов, Янăш ял тăрăх пуçлăхĕ Иван Грачев та хăйсен должноçĕсене сыхласа хăварнă.
Кÿкеçри хăй тытăмлăх органĕнче çĕнĕ пуçлăх – райцентра Владимир Вершинин ертсе пырĕ. Лапсар, Атайкасси ял тăрăхĕсен пуçлăхĕсен ячĕсене ĕнер пĕлтернĕ: Алексей Иванов тата Юрий Башкиров. Паян конкурс Ишлей ял тăрăхĕнче иртĕ. Тутаркасси тата Шĕнерпуç ял тăрăх пуçлăхĕсене ноябрĕн 16-мĕшĕнче иртекен конкурс хыççăн çирĕплетĕç.
НИКОЛАЙ СМИРНОВ, АТĂЛЪЯЛ
