2018 çулта футболла выляс енĕпе тĕнче чемпионачĕ Раççейре пулать. Çавна кура пирĕн республикăра та мечĕке хăвалакансен шучĕ ÿссех пырать. Уйрăмах Шупашкар районĕнче сисĕнет çак туртăм. Ытти спорт дисциплинипе танлаштарсан пирĕн çĕр планети çинче футбол чи массăллă вăйă шутĕнче. Ватти те, вĕтти те сăран пÿскене хăвалама хавас. Иртнĕ канмалли кунсенче акă телевизорпа Австралирен килнĕ Ник Вуйчича кăтартрĕç. Хăйĕн алли те, ури те çук! Кăна пăхмасăрах футболла вылять. Пуçĕпе те пулин мечĕке çапса хапхана голсем кĕртет. Вăт камран тĕслĕх илмелле!

Кÿкеçри «Улăп» спорта сывлăх центрĕнчи тумсене улăштармалли пÿлĕмре те футбол теми малалла тăсăлчĕ. Пĕр футболист, Сергей ятлăскер, туй хыççăнхи пурнăçне аса илчĕ: «Авлансан ман пурнăç аптăрамаллах марччĕ. Çур çул кун сиктерсе тренировкăсене çÿренишĕн пĕрре те ÿпкелемерĕ-ха арăм. Кайран чăтăмĕ пĕтрĕ пулмалла: «Е футбол, е эпĕ», – терĕ. «Юрать, ырантан эпĕ ĕçе çÿреме пăрахса кÿршĕ Ваççа пек пирус туртма, эрех ĕçме тата 30 çулти качча кайман Наçтиç патне улаха кайма пуçлатăп,– терĕм тет. – Çав сăмахсем хыççăн 20 çул пĕрле пурăнатпăр, анчах футбол вăййине хурласа калаçнине мăшăртан пĕрре те илтмерĕм»,– терĕ арçын калаçăва вĕçлесе.

Иртнĕ канмалли кунсенче Космонавтика, Çĕнтерÿ тата Мăнкун уявĕсене халалласа Кÿкеçре 40 çултан иртнĕ арçынсен хушшинче мини-футбол турнирĕ пулчĕ. Çивĕч кĕрешÿре Кÿкеç ял тăрăх команди пĕрремĕш вырăн йышăнчĕ. Вĕсемшĕн Павел Цветков (капитан), Сергей Ванюшкин, Валерий Шмелев, Андрей Красных, Петр Козлов (хапхаçă), Виталий Петров тăрăшса вылярĕç. Иккĕмĕш вырăна Вăрман-Çĕктер, виççĕмĕшне «Алрост» ООО командисем тивĕçрĕç. Шорккапа Шемшер пĕрлештернĕ ял команди те вĕсен хыççăнах пычĕ.

Йĕркелÿ комитечĕ чи нумай гол кĕртекен Шмелева, чи лайăх хапхаçăна Кудряшова, чи лайăх тапăнса вылякан Алексеева тата чи опытлă футболиста (çак йĕркесен авторне) ятарлă парнесемпе чысларĕ.

НИКОЛАЙ ПЛАТОНОВ, ШОРККА