Чăваш Республикин Президенчĕн 2011 çулхи октябрĕн 7-мĕшĕнчи Указĕпе килĕшÿллĕн «Ĕç ветеранĕ» ята илме халĕччен арçынсен ĕç стажĕ 45 çул кирлĕ пулнă, хĕрарăмсене – 40 çул. Çак кунсенче, ноябрĕн 26-мĕшĕнче, документа кĕртнĕ улшăнусемпе килĕшÿллĕн хĕрарăмсем çак ята 37 çул та 6 уйăх стаж пулсан илĕç, арçынсем – 42 çул та 6 уйăхран.
Çапла вара унчченхи «ценз» 2,5 çул чакать. ЧР пуçлăхĕ Михаил Игнатьев çакăн пек йышăну пирки Министрсен Кабинечĕн черетлĕ ларăвĕнче пĕлтернĕ.
Бюджетра патшалăх служащийĕсене субсиди тÿлемешкĕн пăхса хăварнă укçана – 35 млн тенке – депутатсем чиновниксем валли мар, шăпах ветерансемшĕн тăкаклама сĕннĕ.
Çулсене чакарнине кура «Ĕç ветеранĕ» ята тивĕçекенсен йышĕ 10 пин çынна та çитĕ – палăртаççĕ регион правительствинче. «Ку вăл – экономикăна йывăр çулсенче çĕкленĕ вун-вун пин ĕççынни. Çак йышăнушăн вĕсем тав тăваççĕ, вăл тĕрĕс пулчĕ», – палăртнă Михаил Васильевич. Çакна хатĕрленме вăхăт пур – улшăнăвăн çулсене чакаракан пункчĕ çитес çулхи июнĕн 1-мĕшĕнчен вăя кĕрет.
Шупашкар район администрацийĕн халăха социаллă пулăшу паракан уйрăмĕнчен пĕлтернĕ тăрăх асăннă Указ вăя кĕнĕренпе районта стаж çулĕсене кура 1281 çын Ĕç ветеранĕн ятне илнĕ. Пĕтĕмпе вара районта 2011 çул вĕçленнĕ тĕле 7371 Ĕç ветеранне шута илнĕ пулсан ноябрĕн 26-мĕшĕ тĕлне çÿлерех асăннă Указ витĕмĕпе вĕсен йышĕ 9442 çынна çитнĕ.
Валентина ГЕНЕРАЛОВА, Ĕç ветеранĕ:
– Кашни уйрăм çынна тăрăшулăхшăн хавхалантармалли çак меслете районти çĕр-çĕр çын кĕтрĕ – хăшĕ-пĕрин сумлă ятпа тивĕçлĕ канăва тухма кăшт çеç вăхăт çитеймен, теприсен пĕр-икĕ çул кăна. Асăннă çĕнĕлĕх патшалăх ĕç çыннисен тăрăшулăхне тивĕçлипе хак пама пултарнине тепĕр хут кăтартса пачĕ. Чăваш Республикин Ĕç ветеранĕсене уйăхсерен 1082 тенкĕпе танлашакан тÿлевпе тивĕçтереççĕ тата çыхăну пулăшăвĕн тăкакĕсен 50 процентне саплаштараççĕ – патшалăх тимлĕхĕ сисĕнет».
