Чăваш Республикинчи пур районти пекех, Шупашкар районĕнче те кашни эрнерех социаллă пĕлтерĕшлĕ тавар хакĕсен мониторингĕ иртет. Результатсем ЧР экономика министерствине кайĕç. Ноябрĕн 27-мĕшĕнче райадминистраци пуçлăхĕ Георгий Егоров тата райадминистрацин экономика пайĕн ертÿçин çумĕ Людмила Софронова Кÿкеçри лавккасенче социаллă пĕлтерĕшлĕ таварсен хакĕсемпе паллашрĕç.
Тĕрĕслев ушкăнĕ Кÿкеçри 5 лавккара пулчĕ – Гастроном (Ишлей райповĕ), «Провиант» (О.А. Кудрявцева ИП), «Грант плюс» (ООО), «Сахарок» тата «Пятерочка» лавккасем. Георгий Ивановичпа Людмила Васильевнăна лавккасенче хура тул кĕрпи, тип çу, çăмарта, аш-какай (вăл шутра кăлпассисем те), тата ытти тавар хакĕсем кăсăклантарчĕç. Лавккасенчи прилавккасенче пирĕн республикăри предприятисем туса кăларакан таварсен йышĕ те интереслентерчĕ. Тĕрĕслев çакна кăтартса пачĕ – асăннă лавккасенчи социаллă пĕлтерĕшлĕ таварсенчен 60% ЧР предприятисемпе организацийĕсем туса кăларакан продукцисем. Хакĕсем те Чăвашстат палăртнине çывăх. «Провиант» лавккара кăна хура тул кĕрпин хакĕ пысăкки палăрчĕ. «Гастрономра» çак кĕрпешĕн 60 тенкĕ, «Пятерочкăра» – 900 г-шăн 55 тенкĕ те 95 пус, «Сахарокра» 56 тенкĕ те 10 пус ыйтаççĕ пулсан, «Провиант» лавккара хуратул кĕрпи 80 тенкĕ тăрать. Лавкка хуçи çакна хура тул кĕрпине курттăмăн 63 тенкĕ те 20 пуспа туяннипе сăлтавлать. Çакна вăл тавар чекĕпе те ĕнентерсе пачĕ. «Грант плюс» лавккара вара хура тул кĕрпи 2 эрне каяллах сутлăхра юлман, унăн курттăм хакĕ ÿснĕрен туянма тăхтаса тăраççĕ. «Провиант» лавккара хура тул кĕрпин хакĕ пысăк пулнине район администрацийĕ ЧР монополипе кĕрешекен службине пĕлтернĕ.
ВЕРА ФИЛИППОВА
