Пĕрлĕхлĕ медицина полисĕпе кирек мĕнле поликлиникăра та медицина пулăшăвĕ илме пулать тенине илтнĕччĕ, калăпăр, эпĕ районта пурăнатăп, хулари поликлиникăри тухтăрсем патне те çÿреме пултараятăп. Хăш поликлиникăсене-ши? Вĕсене мĕн чухлĕ улăштарма юрать?

Павел КИРОВСКИЙ, Кÿкеç

Марина МАКСИМОВА, Страхлакан компанин медицина пулăшăвĕн пахалăхне контрольлекен пай пуçлăхĕ:

– Пĕрлĕхлĕ медицина страхованийĕн полисĕ Раççей Федерацийĕнчи пур территорире те ĕçлет. РФ Сывлăх сыхлав тата социаллă аталану министерствин 2012 çулхи апрелĕн 26-мĕшĕнчи хушăвĕпе килĕшÿллĕн (унта шăпах çынсене тÿлевсĕр медицина пулăшăвĕ памалли йĕркесене çырса кăтартнă) сирĕн медицина учрежденине суйлама ирĕк пур. Енчен те Шупашкарти пĕр-пĕр поликлиникăра медицина пулăшăвĕ илес тесессĕн унăн тĕп тухтăрĕн ячĕпе заявлени çырмалла.

Палăртса хăварни вырăнлă: çакă хула поликлиникисене кăна пырса тивет, республика шайĕнчисене суйлама май çук. Çав вăхăтрах маларах медпулăшу илсе тăнă поликлиникăран кайма заявлени çырмалла. Сире унтан шутран кăларĕç. Поликлиникăна çирĕплетсессĕн эсир унти тухтăрсем патне çÿреме пултаратăр. Тĕрĕссипе, сире нихăш поликлиникăра та хирĕçлеме тивĕç мар. Медучреждение вара çулталăкра пĕр хутчен кăна улăштарма юрать. Кăсăклантаракан ыйтусене «хĕрÿ лини» телефонĕпе 8(8352) 66-22-26 тата 8-800-25-00-226 тÿлевсĕр номерпе шăнкăравласа пĕлме те пултаратăр.