Пысăк яваплăха хăйĕн çине илнĕ политика хăвачĕ суйлав умĕнхи программăна хатĕрлет
«Эпир çынсем тата çĕршыв аталанăвĕ çинче перекетлемĕпĕр. Пушшех те, укçа-тенке кризисра та аталанакан отрасле ярассине малалла тăсăпăр. Ку вăл – ял хуçалăхĕ, металлурги, хими промышленноçĕн уйрăм отраслĕсем, машиностроени…», – «Единая Россия» партин февралĕн 5-6-мĕшĕсенче Мускавра иртнĕ XV Съездĕнче парти председателĕ, Раççей Федерацийĕн премьер-министрĕ Дмитрий Медведев çакăн пек сăмахсемпе тухса калаçнă.
Чăваш Республикинчен Съезда Партин Чăваш Енри регион уйрăмĕн секретарĕ Николай Малов, унăн çумĕ – парти председателĕн Дмитрий Медведевăн регионри обществăлла йышăну пÿлĕмĕн тата Регионри ĕç тăвакан комитетăн ертÿçисем Николай Николаевпа Дмитрий Щепелев, ытти делегат хутшăннă.
Съезд хăйĕн ĕçне малтанхи сасăлав положенийĕн проектне сÿтсе явнинчен пуçланă. Дискуссисем çавăн пекех «Бюджет тата налог политики», «Вĕрентÿпе наука», «Сывлăх», «Социаллă политика», «Ял хуçалăх аталанăвĕ» т. ыт. площадкăсенче иртнĕ.
Пленарлă ларура парти ертÿçи «Единая Россия» çĕршыв Президенчĕн политика ресурсĕ пулнине палăртнă. «Единая Россия» ĕç тăвакан влаçа – Раççей Правительствине – йĕркелерĕ тесен те йăнăш мар. Эпир çирĕппĕн политикăн çĕнĕ тапхăрне пырса кĕретпĕр»,– тенĕ Д. Медведев.
Съездăн иккĕмĕш кунĕнче делегатсем суйлав умĕнхи программăна хатĕрлекен комиссие туса хурассишĕн сасăланă. Парти унпа РФ Патшалăх Думине кăçалхи сентябрь уйăхĕнче иртекен суйлава хутшăнать.
Николай Малов, «Единая Россия» партин Чăваш Енри регион уйрăмĕн секретарĕ:
– Парти Председателĕн докладĕнче экономикăри пур ене те сыхласа хăварас, халăхăн хÿтлĕхсĕр сийне пулăшас, партин пур проектне те малалла тăсас шухăшсем хĕрлĕ йĕрпе туртнă пек иртеççĕ. Ку вăл – ялти шкулсен спортзалĕсен реконструкцийĕ те, вĕсене çĕнĕрен тăвасси те, шкулсем çĕклесси те. Дмитрий Анатольевич пушă сăмахсем памалла марри пирки чĕнсе каларĕ. Енчен те шантарсан – вĕсене пурнăçламаллах. Паян çакăн пек яваплăха хăйĕн çине илме хатĕр политика хăвачĕ урăх çук. Парти Председателĕн докладне регионри уйрăмра пăхса тухатпăр. Унта лартнă тĕллевсене пурне те республика çыннисемпе, Чăваш Ен Пуçлăхĕпе тата, паллах, «Единая Россия» парти членĕсемпе пĕрле пурнăçа кĕртĕпĕр.
Май уйăхĕн 22-мĕшĕнче пирĕн партин малтанхи сасăлавне ирттермелле. Съездăн иккĕмĕш тапхăрĕнче, июнь уйăхĕнче, «Единая Россия» парти кандидачĕсен списокне çирĕплетĕпĕр.
Андрей НИКОЛАЕВ, «Единая Россия» партин Шупашкар районĕнчи уйрăмĕн секретарĕ:
– Дмитрий Медведев хăйĕн сăмахĕнче кăçалхи çул яваплă йышăнусен çулталăкĕ пулнине палăртнă. Ăна вара чиновниксемпе политиксем мар, çĕршыв çыннисем тăвĕç. Ансат мар вăхăтра çĕршыва ертсе пырассине камăн аллине памалла, халăх пурнăçне кам лайăхрах тума пултарĕ, экономикăна пĕр тикĕс аталанупа кам тивĕçтерĕ – кăна халăх палăртĕ. Çынсене мĕн пăшăрхантарни пирки пирĕн уççăн калаçмалла, чи çивĕч ыйтусене хускатнă чухне шăп тăмалла мар, чи йывăр йышăнусене тума хистенĕ сăлтавсем пирки вĕсене ăнлантармалла. Парти председателĕ чĕнсе каланине партин районти уйрăмĕн членĕсемпе, влаçăн ĕç тăвакан органĕсемпе, халăхпа пĕрле туллин пурнăçлăпăр.
ТАИСИЯ КРОТОВА
