Виçĕм кун Чăваш Ене РФ Президенчĕн федерацин Атăлçи округĕнчи полномочиллĕ представителĕ Михаил Бабич ĕçлĕ çулçÿревпе килнĕ.
Вăл ертсе пынипе федерацин Атăлçи округĕнчи çамрăксен канашĕн ларăвĕ иртнĕ. Унта ЧР Пуçлăхĕ Михаил Игнатьев та хутшăннă. Ларура патриотла воспитани парас ыйтусене пăхса тухнă, вĕсене çамрăксен пĕрлешĕвĕсене явăçтарасси çинчен калаçнă. Михаил Бабич паян, геополитика лару-тăрăвĕ кăткăс чухне, тăван çĕршыва хаклакан, патриотизм воспитанийĕ илнĕ çамрăксен позицийĕ пысăк пĕлтерĕшлине палăртнă. «Сирĕн паян хăйне евĕрлĕ шанăç пур – сирĕн пĕлĕвĕр, пултарулăхăр Раççее нихăçанхинчен те кирлĕрех», – тенĕ вăл Атăлçи тăрăхĕнчи çамрăксен канашĕн членĕсене.
«Экономикăри йывăрлăхсене пăхмасăр 2017 çул тĕлне граждансене авариллĕ çуртсенчен куçарас тĕллеве пурнăçламалла», – пĕлтернĕ Михаил Бабич ЖКХ объекчĕсене 2015-2016 çулхи хĕллехи тапхăра хатĕрлес, граждансене авариллĕ çуртсенчен куçарас, тăлăх тата ашшĕ-амăш хÿттисĕр юлнă ачасем валли çуртсем хăпартас ыйтусене çав кунах пăхса тухнă канашлура. Унта ЧР Пуçлăхĕ Михаил Игнатьев, Раççей Генеральнăй прокурорĕн çумĕ Сергей Зайцев, РФ строительство, кил-çуртпа коммуналлă хуçалăх министрĕн çумĕ Андрей Чибис тата ыттисем хутшăннă.
Михаил Бабич асăннă ыйтусем халăхшăн пĕлтерĕшлине, вĕсем Владимир Путинăн майри указĕсенче сăнланнине палăртнă. «Çурт-йĕре çынсем туянма пултаракан хакпа сутмалла, коммерциллĕ çурт-йĕрпе çăмăллăхсемпе усă куракан граждансем валли тунисемпе пĕрлештермешкĕн ахаль ресурссем кăна мар, оптималлă çул-йĕрсем те тупмалла, – палăртса хăварнă вăл. – Кунта, Чăваш Енре, ытти регионпа танлаштарсан, лайăх ÿкерчĕк палăрать».
Андрей Чибис та Чăваш Республикине граждансене авариллĕ кил-çуртран куçарассипе федерацин Атăлçи округĕнче малта пыракан регион шутне кĕртнине пĕлтернĕ. Михаил Бабич граждансене авариллĕ кил-çуртран куçарасси, тăлăх тата ашшĕ-амăш хÿттисĕр юлнă ачасем валли çуртсем тăвасси чи пĕлтерĕшлĕ ыйтусем пулнине палăртса хăварнă.
ЧР Пуçлăхĕ Михаил Игнатьев Михаил Бабича шаннăшăн тата Чăваш Республикинче канашлу ирттернĕшĕн тав тунă.
Деомид Васильев
