Виçĕм кун райадминистраци залĕнче улттăмĕш созыври район Депутачĕсен пухăвĕн депутачĕсен пĕрремĕш ларăвĕ иртрĕ. Унта ЧР конкурентлă политика тата тарифсен патшалăх службин пуçлăхĕ Альбина Егорова, райадминистраци пуçлăхĕ пулнă Георгий Егоров, ял тăрăх, администрацин пай пуçлăхĕсем тата ыттисем хутшăнчĕç.

Шупашкар районĕн Территорири суйлав комиссийĕн председателĕ Зоя Маслова сентябрĕн 13-мĕшĕнче иртнĕ пĕрлехи суйлав пĕтĕмлетĕвĕсемпе паллаштарчĕ, районта вăл йĕркепе килĕшÿллĕн, лăпкă иртнине пĕлтерчĕ. Улттăмĕш созыври депутатсене вăхăтлăх удостоверени парсан тĕп ыйту – председателе, район пуçлăхне суйласси – тухса тăчĕ. Виçĕ çула яхăн çак çăмăл мар ĕçре тăрăшнă Алевтина Исаева ку тивĕçе хăйĕнчен сирнине пĕлтерчĕ. Пухури чи аслă çулти депутат Юрий Порфирьев тăрăшуллă çамрăксене çул памаллине палăртса Çĕнĕ Тренккасси суйлав округĕнчен çĕнтернĕ Андрей Николаев кандидатурине сĕнчĕ. Депутатсен уçă сасăлавпа иртнĕ пĕтĕмлетĕвĕ çапларах пулчĕ: вĕсем пĕр саслăн Андрей Николаева район пуçлăхне суйларĕç.

– Шупашкар районĕ Чăваш Республикинчи ытти районтан самай урăхларах, унта кăткăслăх сахал мар. Унăн пуçлăхĕнче ĕçлемешкĕн ăнăçу сунатăп, – çĕнĕ пуçлăха суйланнă ятпа саламларĕ Альбина Егорова. «Мана шаннăшăн пурне те тав. Эпир пурте пĕрле тăрăшса ĕçлесен нумай ырă ĕç тума пултаратпăр», – хуравларĕ Андрей Николаев.

Салам сăмахĕсем хыççăн депутатсем кун йĕркинчи ыйтусене пăхса тухрĕç. Малтанах Депутатсен пухăвĕн секретариатне палăртрĕç, унăн членĕсем пулма Валерий Васильева тата Надежда Ивановăна суйларĕç. Тепĕр ыйту – председателĕн çумне палăртасси. Сĕннĕ кандидата, Владимир Федорова, хирĕç сасăлакан пулмарĕ.

Сентябрĕн 23-мĕшĕнчен райадминистрацин пуçлăхĕн тивĕçĕсене унăн пĕрремĕш çумĕ, экономика, пурлăх тата çĕр хутшăнăвĕсен пай пуçлăхĕ Зоя Маслова пурнăçлĕ – депутатсем çак йышăнăва та турĕç.

Çавăн пекех халăхăн шаннă çыннисем райадминистраци пуçлăхне суйламашкăн конкурс комиссийĕн йышне кĕмелли кандидатсене палăртрĕç. Унта 10 çын пулмалла, çуррине районти Депутатсен пухăвĕ палăртать, тепĕр çуррине – ЧР Пуçлăхĕ. Шупашкар район Депутачĕсен пухăвĕн депутачĕсем асăннă конкурс комиссине район пуçлăхне Андрей Николаева, райадминистрацин пĕрремĕш çумне Зоя Масловăна, Çатракасси тата Атайкасси суйлав округĕсенчен суйланнă Алевтина Исаевăна тата Юрий Порфирьева, Раççей пенсионерĕсен союзĕн районти уйрăмĕн председательне Ростислав Данилова кĕртессишĕн пĕр шухăшлăн сасăларĕç.

Кĕске справка

Андрей Геннадьевич Николаев

çуралнă: 1983 çулхи майăн 30-мĕшĕнче, Тренккассинче;

вĕреннĕ: Тренккасси шкулĕнче, Мускав автомобильпе çул-йĕр университетĕнче;

ĕçленĕ: Мускаври тата Санкт-Петербургри строительство фирмисенче, 2010 çултанпа хăй тĕллĕн ĕçлекен предприниматель, «Кугеси» Бизнес-центр» пуçлăхĕ;

ят-сум: «Чăваш Енри чи лайăх предприниматель» (2012ç.) ята çĕнсе илнĕ.

ЛЮБОВЬ ГОРОДИЩЕНСКАЯ