Иртнĕ канмалли кун Пĕтĕм тĕнчери «Сочи-2015» инвестици форумĕнче Чăваш Ен Пуçлăхĕ Михаил Игнатьев Правительствăн импорта улăштарас енĕпе ĕçлекен комисси ларăвне хутшăннă. Ăна Дмитрий Медведев премьер-министр ертсе пынă.
Правительство пуçлăхĕ Дмитрий Медведев федераци тата регионсен шайĕнче промышленноçа пулăшмалли механизмсене туса хунине палăртнă. «Регионсем вĕсемпе ăнăçлă усă кураççĕ, çавна май пĕр-пĕрин опычĕпе паллашни, чи лайăх тĕслĕхсене тиражлани пысăк пĕлтерĕшлĕ», – тенĕ вăл. Чăваш Енре импорта хамăрăн продукципе улăштарас патшалăх политики республикăра аван пурнăçланать: регион форум вăхăтĕнче çакна тивĕçлĕ шайра кăтартма пултарнă. Кăна «çул-йĕр картти» тăрăх та хаклама май пур. Промышленноç предприятийĕсем чикĕ леш енчен кÿрекен чĕр тавара, комплектламалли хатĕрсене Раççей аналогĕсемпе улăштараççĕ. Республика территорийĕнче ĕçлекен производствăсене анлăлатас, çĕннисене уçас тĕллевлĕ инвестици проекчĕсем тухăçлăн пурнăçланаççĕ.
Сочире Михаил Игнатьев çавăн пекех федерацин ĕç тăвакан влаç органĕсен темиçе ертÿçипе тĕл пулнă. Ял хуçалăх министрĕпе Александр Ткачевпа кĕске вăхăтлăха тата инвестици шучĕпе илекен кредитсен процент виçин пĕр пайне патшалăх енчен субсидилемелли хушма кредитсем уйăрмалли майсене тишкернĕ. Промышленноç тата суту-илÿ министрĕпе Денис Мантуровпа сÿтсе явнă ыйту Чăваш Енре импорта хамăрăн продукципе улăштарассипе çыхăннă. Министр Чăваш Енри организацисем Промышленноç аталанăвĕн фондне тăратнă заявкăсене тĕплĕ тишкерме шантарнă. РФ ĕçлев министрĕпе Максим Топилинпа курнăçса халăха ĕçпе тивĕçтерес ыйтусене сÿтсе явнă май республикăн ĕç рынокĕнчи çивĕчлĕхе чакармалли программине пурнăçлама федераци бюджетĕнчен 56 млн тенкĕ куçарасси çинчен калаçса татăлнă. РФ вице-премьерĕпе Ольга Голодецпа Чăваш Енĕн социаллă сферин аталанăвĕн ыйтăвĕсене тишкернĕ. Раççей финанс министрĕпе Антон Силуановпа бюджет дефицитне саплаштармалли дотацисен ыйтăвне сÿтсе явнă. «Газпром» ПАО правленийĕн председателĕпе Алексей Миллерпа курнăçнă чухне Атăл леш енне газификацилемелли программăна пурнăçламалли ыйтусем тĕп вырăнта пулнă.
