Икĕ хут вăйпа

Комисси район администрацийĕн тивĕçлĕ пуçлăхĕн ятне пĕлтерчĕ

Шупашкар районĕн улттăмĕш созыври Депутатсен пухăвĕн черетсĕр виççĕмĕш ларăвĕ ĕнер пăхса тухнă 6 ыйтуран чи пĕлтерĕшли, ахăртнех, пĕрремĕшĕ пулчĕтĕр. Шăпах вăл райадминистраци пуçлăхне çирĕплетессипе çыхăннăччĕ.

Конкурс комиссийĕн председателĕ – ЧР тарифсен патшалăх службин ертÿçи Альбина Егорова пĕлтернĕ тăрăх, хăйĕн кандидатурисене çак должноçе тăваттăн сĕннĕ: Георгий Егоров, Олег Александров, Вениамин Марков, Дмитрий Васюков. Комиссин иккĕмĕш ларăвĕнче конкурса собеседовани мелĕпе ирттерме йышăннăччĕ. Унăн положенийĕпе килĕшÿллĕн, кашни кандидатăн районăн пилĕк çуллăх аталанăвĕн стратегине хатĕрлемелле пулнă. Кунсăр пуçне, паллах, комисси членĕсен кĕтмен тата хивре ыйтăвĕсене те хуравлама тивнĕ. Унăн кашни членĕ протоколпа çирĕплетнĕ хаклав листи çинче хăйĕн шухăшне палăртнă. Полномочисен вăхăчĕ тухиччен çак тивĕçе пурнăçланă Георгий Егоров лару йышăнăвĕпе тата собеседовани пĕтĕмлетĕвĕсемпе чи нумай балл пухнă – райадминистрацие малалла та ертсе пыма тивĕçлĕ кандидат пулса тăнă. Альбина Егоровна сĕннипе Депутатсен пухăвĕ конкурса пулса иртнĕ, райадминистраци пуçлăхне палăртнă тесе йышăнчĕ. Пуху председателĕ Андрей Николаев Георгий Ивановича президиумра хăйĕн вырăнне йышăнма ыйтрĕ. Икĕ пуçлăх – районăн тата администрацин – контракта алă пуснă самантран улттăмĕш созыври депутатсен районти Пухăвĕн полномочийĕн вăхăчĕ иртиччен халăх ыйтăвĕсене пĕрле татса парассишĕн яваплă. Георгий Иванович хумханнине пытармарĕ: шанни тата ĕненни яланах хавхалантарать. «Хыçа юлнă виçĕ çулта эпир сирĕнпе сахал мар ĕç туса ирттертĕмĕр, чылай проекта пурнăçа кĕртрĕмĕр: ку вăл – районта ăнăçлă пурнăçланнă «Хăрушлăхсăр муниципаллă йĕркеленÿ», «Пултаруллă çамрăксене хавхалантарасси», «Физкультурăпа спорта аталантарасси» программăсем те, усă курман çĕрсене çаврăнăша кĕртнĕшĕн ял хуçалăх таварне туса илекенсен тăкакĕсене субсидилессипе çыхăннă пуçару та… Шкулчченхи ÿсĕмри ачасен садиксенчи вăрăм черетне пĕтерме май килчĕ, тахçантанпах кĕтнĕ район энциклопедине кун çути кăтартрăмăр, регионра старостăсен пухăвне пĕрремĕш йĕркелерĕмĕр…», – аса илчĕ Георгий Иванович.

Сăмах май

«В контакте» социаллă сайтри «Общественный совет п. Кугеси» ушкăнра йĕркеленĕ сасăлавра та Интернетпа усă куракансем пĕр шухăш патне килсе тухнă: унта Георгий Егоров чи нумай сасă пухнă.

Республика Пуçлăхĕн ячĕпе сăмах илнĕ май Альбина Егоровна Шупашкар районĕнче депутатсен корпусĕнчен, райадминистраци ертÿлĕхĕнчен тăракан тулли командăна йĕркелесси вĕçленнине палăртрĕ. «Халĕ Михаил Игнатьев палăртнă çулйĕрпе пырса хамăр умри тĕллевсене, суйлавçăсене, район çыннисене шантарнине пурнăçлама икĕ хут ытларах вăй хумалли кăна юлать», терĕ вăл. Вăл вара, иккĕленÿ çук, районăн çителĕклипех.

Шухăш

Альбина ЕГОРОВА, Шупашкар райадминистраци пуçлăхĕн должноçне йышăнакан конкурс комиссийĕн председателĕ:

– Конкурса хутшăннă кандидатсем пурте хастар пулчĕç, вĕсем район аталанăвне тишкерсе тăни лайăх сисĕнчĕ. Кашниех райадминистраци пуçлăхĕнче ĕçлес çулйĕре уçса пачĕ, плансене палăртрĕ, кĕскен каласан, тăваттăшĕ те хăйсене тивĕçлĕ кăтартрĕç. Эпир, комисси членĕсем, вĕсене тĕрĕсленĕ чухне 5 тĕрлĕ ыйту çине пусăм турăмăр. Комиссин кашни членĕ кандидатсене хăйне майлă хакларĕ. Конкурс пĕтĕмлетĕвĕпе Георгий Егоров ыттисенчен уйрăмах пысăк кăтарту – 245 балл – пухса çĕнтерчĕ. Çакнашкал суйлавра, паллах, Георгий Иванович халиччен Шупашкар районне ертсе пынине, района мĕнле аталантарнине те тĕп вырăна хутăмăр. Вăл малашне те район çыннисен пурнăçне лайăхлатассишĕн çине тăрасса шанатпăр.

Виктория Вышинская, Любовь Городищенская

Если вы нашли ошибку, пожалуйста, выделите фрагмент текста и нажмите Ctrl+Enter.

Открыть все новости