Тутаркассинчи „Золушка“ ача садĕнче сывлăш температури виçерен пĕчĕкрех. Пÿлĕмсенче сивĕ пулнине кура поселокра пурăнакансем ыйтăва татса пама райадминистраци ертÿçинчен пулăшу ыйтнă. Георгий Егоров ытлари кун районта ăшăпа тивĕç­терессипе çыхăннă лару-тăрупа паллашма Тутаркасси ял тăрăхĕнче пулнă.

Тутаркассинче ыйтăва управляющи компани специалисчĕсемпе пĕрле сÿтсе явнă май ăшă паракан тытăмра насоса улăштарнă, унăн ĕçне йĕркеленĕ – Шупашкар район администрацийĕн сайчĕ çинче çакăн пирки пĕлтереççĕ.

Ку ыйтăва Георгий Егоров юн кун «Теплоэнегосеть» ООО – Тутаркассинче ăшăпа тивĕçтерессипе çак организаци ĕçлет – тĕп инженерĕпе Николай Москалевпа тĕл пулнă май тепĕр хут хускатрĕ. «Пÿлĕмсенче сивĕ пулсан ачасем чирлеççĕ – çавăнпа та ăшша хĕрхенмелле мар, температурăна хăпартмалла», – асăрхаттарчĕ вăл.

Çак эрнерех пуçлăх Шĕнерпуç ял тăрăхĕнче пулнă. Çĕнĕ Тренккассинче Георгий Егоров  «Родничок» ача садĕнче уçăлакан икĕ хушма ушкăн пÿлĕмĕсене пăхнă. 2013 çулта кунта хушма пĕр ушкăн уçăлма ĕлкĕрнĕ те ĕнтĕ. Паян вара пĕтĕмпе 5 ушкăн ачасене йышăнать.