Патшалăх Канашĕн депутачĕсемшĕн сасăламалли вăхăт çывхарнăçемĕн политикăри лару-тăру хĕрсех пырать тейĕн.

Иртнĕ эрнере журналистсемпе курнăçнă май Чăваш Ен парламентĕнчи «Справедливая Россия» фракци членĕ Владимир Михайлов хăй «Единая Россия» ячĕпе праймериза хутшăнасси çинчен пĕлтерчĕ. Патшалăх Канашĕнче «СР» фракцире 4,5 çул ĕçлесе пысăк опыт пухнине каларĕ-ха вăл, анчах çак тапхăр чунĕпе «эсерсемпе» туллин пĕрлешме çителĕклĕ пулайман-мĕн. Чылай енĕпе вĕсемпе пĕр шухăш патне килсе тухаймасăр «Справедливая Россия» партие те кĕмен иккен. Çавăнпах хăйне «Единая Россия» списокĕнче праймериза хутшăнма сĕнсен хирĕçлемен. «Единая Россия» йышĕнче пысăкрах усă кÿрĕп, унта тĕллевсене пурнăçламалли майсем те пысăкрах, «эпĕ ĕçлекенсемпе пĕр командăра пуласшăн», – шанать депутат.

Патшалăх Канашĕнчи тепĕр «эсер» та, Леонид Лукин депутат, «Справедливая Россия» фракципе те, партипе те сыв пуллашма шут тытнă. 10 çул «Справедливая Россия» партире тăнăскер унтан тухма заявлени çырнă ĕнтĕ. Вăл хăйĕн çак утăмне партири чылай ыйту хуравсăр юлнипе, партин федераци шайĕнчи ертÿçисем «политикăлла вылясах кайнипе» сăлтавлать. Ăна та «Единая Россия» списокĕнче праймериза хутшăнма сĕннĕ.

«Единая Россия» партин Чăваш регион уйрăмĕн политканашĕн секретарĕ Николай Малов ĕç-пуçа çапларах уçăмлатать:

– Суйлав кампанийĕ старт илчĕ теме юрать. «Единая Россия» ячĕпе малтанхи суйлава, праймериза, хутшăнмашкăн çыннăн 21 çултан çамрăк мар, пирĕн парти членĕ, ун майлă е партие кĕмен çын пулмалла. Хирĕçтерсе ярас кăмăллисем питĕ нумай, çавăнпа та пирĕн пĕрле пулмалла, пĕрлешмелле. Май уйăхĕн 22-мĕшĕ – малтанхи сасăлав кунĕ. Унта хутшăнма кăмăл тунисене пурне те йышăнăпăр. Юлашки, татăклă сăмаха суйлавçăсем калĕç.

Аса илтерни вырăнлă: нумаях пулмасть коммунистсен фракцийĕн лидерĕ Дмитрий Евсеев КПРФ ретĕнчен тухрĕ. Çакăн сăлтавĕ пирки эпир «Тăван Енĕн» иртнĕ номерĕнче çырса пĕлтернĕччĕ.

ТАТЬЯНА МАЙОРОВА