Çÿлĕсене кура мар ăслă калаçрĕ вăл, хăйне мăн çын пекех тыткаларĕ. Темĕнле вăрттăнлăх пур пек туйăнчĕ унра, йăнăшмарăм иккен, чăнахах та çапла. Яшра тĕрлĕ талант килĕшсе тăрать. Сăмахăм Вăрман-Çĕктер шкулĕнче 9-мĕш класра вĕренекен Григорий Петухов пирки.
Иртнисĕр пуласлăха пĕлме çук тенине тĕпе хурсах пуль вăл историе кăмăллать, çак предмета çине тăрсах вĕренет. Эпир шкула пынă чухне те асăннă предметпа олимпиадăна хатĕрленетчĕç ачасем, вĕсен йышĕнче Григорий те. Çĕнĕ çулччен район, кăшт каярах республика олимпиадисем иртмелле. Унччен вăхăт чылай-ха тесе лармаççĕ вĕсем, паянах кĕнеке шĕкĕлчеççĕ, тĕрлĕ меслетпе пĕлĕвне тĕрĕслеççĕ. Кун пек пĕлÿ тупăшăвне Григорий пĕрре çеç мар хутшăнать. Малти вырăнсене çĕнсе илни те пулнă. Акă 7-мĕш класра вăл район олимпиадинче пĕрремĕш вырăн йышăннă. Мĕншĕн историе кăмăллать-ха вăл? Мĕн тата мĕнле майпа пулса иртни кăсăклă иккен уншăн. Çак предметпа интересленсех амăшĕ енчи йăхташĕсен несĕл йывăççине хатĕрленĕ. Ытти ача виççĕмĕш сыпăкри тăванне те палламасть пулсан Григорий вара 6 сыпăкри тăванĕсене пурне те пĕлет. «Манăн çемье историйĕ» сочинени çырнă вăл. «70 слов о войне» республика конкурсне хутшăнса 3-мĕш вырăн йышăннă. Яша историпе çыхăннă пĕтĕм тема интереслентерет. Çав шутра – илемлĕ литература хайлавĕсем те. Истори, вăрçă кĕнекисене каçса кайсах вулать. Халĕ акă Н. Островскийĕн «Как закалялась сталь» романне шĕкĕлчет.
Хăй каланă тăрăх, ăна шкулта вĕренме интереслĕ. Килне кашни кун тенĕ пекех каçхине 5 сехет хыççăн çеç килни те çакна лайăх çирĕплетет. Çак вăхăтчен мĕн тăвать тетĕр-и? Уроксем хыççăн олимпиадăна хатĕрленнине асăнтăмăр ĕнтĕ. Кунсăр пуçне тата тĕрлĕ киленĕç канăç памасть çамрăкăн чунне. Вăл пĕр-пĕр хайлава интонаципе питĕ ăста вулать. Хăйĕн пултарулăхне илемлĕ вулакансен Шупашкарта иртнĕ «Национальное достояние» конкурсра та тĕрĕсленĕ. А. Чеховăн классикине интонаципе вуласа I степень лауреачĕ тата I степень дипломанчĕ пулса тăнă.
Григорий ÿкерме те ăста. Уйрăмах – пейзаж. Кăçал «Шевле» конкурса та хутшăннă вăл. Юрлас талант та пур иккен тата! «Çакăн чухлĕ пултарулăхăн çăлкуçĕ ăçтан?» – тĕлĕнсех ыйтрăм унран.
– Аннерен… Тата хам тăрăшни, çынра талант 1% кăна теççĕ вĕт, – хуравларĕ тăрăшуллăскер. Темĕнле киленĕçпе кăсăкланнипех ĕнтĕ унăн пушă вăхăт çукпа пĕрех. Çакăн пек пултаруллă яш ÿссен кам пулассине те пĕлес килчĕ. Унăн ĕмĕчĕсем пур, анчах хальлĕхе ăна пирĕнпе пайламарĕ. Мĕнех, унăн ырă шухăшĕ пурнăçлантăрччĕ кăна.
ЛЮБОВЬ МАН
Если вы нашли ошибку, пожалуйста, выделите фрагмент текста и нажмите Ctrl+Enter.