…агропромышленноç комплексне аталантарма май парать
Ял хуçалăх продукцине туса илекенсем патне патшалăх пулăшăвне вăхăтра çитересси – министерство уйрăмĕсен тата ведомствăна пăхăнса тăракан организацисен ертÿçисемпе çак ыйтăва пăхса тухнă ЧР ял хуçалăх министрĕ Сергей Артамонов черетлĕ канашлу вăхăтĕнче.
Вăхăтра çитермелле
ЧР агропромышленноç комплексне 2016 çула пăхса хунă патшалăх пулăшăвĕн калăпăшĕ августăн 1-мĕшĕ тĕлне 2 млрд та 319 млн тенкĕпе танлашнă. Çав шутран 1 млрд та 350,2 млн тенке ял хуçалăх таварне туса илекенсене тата АПК организацийĕсене куçарса панă та ĕнтĕ. Июль уйăхĕнче федерацирен куçнă укçа-тенкĕ виçи 120,4 млн тенкĕпе танлашнă. Çав нухратăн пĕр пайне выльăх-чĕрлĕх ĕрчетме (31,3 млн тенкĕ), ÿсен-тăран ÿстерме (10,7 млн тенкĕ), аш-какайлăх выльăх-чĕрлĕх ĕрчетме объектсем тума тата реконструкцилеме (0,1 млн тенкĕ), сĕт таварне кÿрекен выльăх-чĕрлĕхе ĕрчетмелли вырăнсене тума тата реконструкцилеме (6,3 млн тенкĕ) илнĕ инвестици кредичĕсен процент ставкисене субсидилеме янă. Унсăр пуçне хуçалăхсен пĕчĕк формисем – хушма хуçалăхсемпе ХФХ-сем – илнĕ кредитсен процент ставкисене субсидилеме 45,0 млн тенкĕ уйăрнă. Ÿсен-тăран ÿстерме тата сĕтлĕ выльăх-чĕрлĕх ĕрчетме кĕске сроклăх кредитсен процент ставкисене саплаштарма уйăрнă субсиди 1,0 млн тата 0,5 млн тенкĕпе танлашнă.
Сергей Геннадьевич канашлура патшалăх пулăшăвне республика аграрийĕсем патне вăхăтра çитерессине çирĕппĕн тĕрĕслемеллине палăртса хăварнă.
Пулăшупа усă курнă
Район территорийĕнчи ял хуçалăх предприятийĕсемпе пĕчĕк хуçалăхсем малтанхи пекех çăмăллатнă кредитсемпе, ăратлă выльăх ĕрчетес тата элитлă вăрлăх хатĕрлес, страховани тытăмне аталантарас енĕпе усă кураççĕ. Райадминистрацин ял хуçалăхĕпе экологи пайĕн кăтартăвĕсемпе июлĕн 1-мĕшĕ тĕлне федераци бюджетĕнчен 279509838,64 тенкĕ, республика бюджетĕнчен 71271510,17 тенкĕ субсиди куçнă, çав шутра хуçалăхăн пĕчĕк формисем илнĕ кредитсен процент ставкисене саплаштарма федераци бюджетĕнчен 2743962 тенкĕ, республика бюджетĕнчен – 1037100 тенкĕ. Инвестици кредичĕсен (çав шутра ÿсен-тăран ÿстерме, выльăх-чĕрлĕх ĕрчетме илнисем) процент ставкине саплаштарма федераци бюджетĕнчен 169191396,26 тенкĕ, республика бюджетĕнчен 43901529,61 тенкĕ килнĕ.
Çăмăллăхпа усă курса Ленин ячĕллĕ СХПК-колхоз акă кăçал «AGROS-550» комбайн та туяннă. Хуçалăх ертÿçи Петр Тунгулов пĕлтернĕ тăрăх, техникăна лизинг меслечĕпе сутăн илнĕ, 6 млн та 200 пин тăракан комбайн хакĕн çуррине хăйсемех саплаштарнă-ха, çуррине тÿлесе татма кĕске вăхăтлăх кредитпа усă курнă.
Паян хуçалăхсенче çĕнĕ технологисемпе усă курмасан, наукăпа техника çитĕнĕвĕсене шута хумасан ÿсĕм тума çук. Çакна шута илсе патшалăх ял хуçалăх предприятийĕсене валли укçа-тенкĕ сахал мар уйăрать. Элитлă вăрлăх туяннипе çыхăннă тăкаксене саплаштарма федераци бюджетĕнчен 548113 тенкĕ, республика бюджетĕнчен 1546000 тенкĕ куçнă. Çак çăмăллăхпа «Атлашевский» СХК, Ленин ячĕллĕ СХПК-колхоз, «Чурачикское» ОАО, «Прогресс» ОАО, «Приволжское» ОАО усă курнă.
Условие пăхăнмарăн – каялла тавăр
Çунтармалли-сĕрмелли материалсем, саппас пайсем, минерал удобренийĕсем тата ытти пурлăх туянма пĕр çулталăклăх кредит илнĕ хуçалăхсене унăн тăкакĕсен пĕр пайне саплаштармалли процент виçине тÿлеме федераци бюджетĕнчен 42429468,66 тенкĕ, республика бюджетĕнчен 18313039,56 тенкĕ субсиди панă. 1 га çине тырă акса тунăшăн субсиди илес тесен вара тĕрлĕ условие пăхăнмалла – тепĕр çулталăкра та кăçалхинчен кая юлмасăр çĕр лаптăкне акмалла, тухăç районти вăтам кăтартăвăн 90%-чен кая мар пулмалла тата ытти те. Çак условисене пăхăнмасан субсидие каялла тавăрса пама лекет. Район территорийĕнчи «Туруновское» СХПК тата «Пучах» СХПК 2012-2013 çулсенче патшалăх пулăшăвĕпе усă курнă, вĕсене район бюджетĕнчен те укçа-тенкĕ уйăрса панă. Анчах хуçалăхсем условие пăснă, суд йышăнăвĕпе субсидие каялла тавăрса памалла тунă.
Сăмах май
2016 çулхи июлĕн 1-мĕшĕ тĕлне Шупашкар районне «Ялăн социаллă аталанăвĕ» программăпа федераци бюджетĕнчен 5591000 тенкĕ, республика бюджетĕнчен 2396300 тенкĕ укçа-тенкĕ куçнă. Ăна ялта ĕçлесе пурăнакансем тата çамрăк специалистсем илме пултараççĕ.
ДЕОМИД ВАСИЛЬЕВ