Иртнĕ вырсарникун автомобиль спортне кăмăллакансем каллех Чăрăшкасси трасси çине пухăннă. Кунта Чăваш Енре мала тухассишĕн автокросс енĕпе чемпионат иртнĕ. Пухăннисене райадминистрацин пуçлăхĕн тивĕçĕсене пурнăçлакан Владимир Димитриев саламланă.
Ăмăртăва республикăри 3 районти тата Мари Элти 21 спортсмен хутшăннă. Вĕсем 1,2 км-лă тумхахлă дистанцие парăнтарнă. Автомобильсене кура 5 класс палăртнă: Д2-юниор, Д2Н, Д2-классика, Д2-1600, Д3-спринт.
Д2-классика класра 2 спортсмен хутшăннă, малти вырăнсене Шупашкарти Сергей Сандыбаевпа Чăрăшкассинчи Александр Осипов пĕр-пĕрин хушшинче пайланă. Д2-1600 класра 10 спортсмен хутшăннă. Малти вырăнсем çапла йĕркеленнĕ: Шупашкарти Виктор Сандыбаев пьедесталăн чи çÿллĕ картлашки çине хăпарма тивĕçнĕ, Чăваш Ен спортсменĕсем Дмитрий Белянинпа Лев Зуев 2-мĕш тата 3-мĕш пулнă. Д2Н класра та маларах асăннă спортсменсемех палăрнă. Д2-юниор класри тупăшăва çармăс çамрăкĕсем кăна хутшăннă. Амирхан Файзрахманов, Кирилл Крекотнев, Данияр Юлдашев пьедесталăн тĕрлĕ картлашки çине хăпарма тивĕçнĕ.
Анна Филиппова
Августăн 27-28-мĕшĕсенче Чистопольте алă вăйĕ виçессипе Пĕтĕм Раççей турнирĕ иртнĕ. Юлия Долгова Раççей спорт мастерĕн нормативĕсене пурнăçланă, пьедесталăн чи çÿллĕ картлашки çине хăпарма тивĕçнĕ.
Августăн 30-мĕшĕ Çĕнĕ Шупашкарта аслăрах çамрăксен хушшинче футболла выляса мала тухассишĕн иртнĕ ăмăртупа асра юлнă. Стадионта «Бурилы» тата «Ротор» командăсем тĕл пулнă, вăйă 0:0 шутпа вĕçленнĕ.
Августăн 31-мĕшĕнче Кÿкеçри стадионта ачасен «Ротор» тата «Темп» футбол командисем республикăра мала тухассишĕн ăмăртнă. Вăйăра «Ротор» хирĕç вылякан командăна 11:0 шутпа парăнтарнă.
Сентябрĕн 3-мĕшĕнче Çĕрпÿре футбол вăййин Чăваш Ен чемпионачĕн 14-мĕш турĕ иртнĕ. Унта «Чурачики» тата «Ротор» командăсем тĕл пулнă, вăйă 4:4 шутпа вĕçленнĕ.
Тепĕр кун Кÿкеç стадионĕ хăнасене йышăннă. «Бурилы» тата «Бомик» командăсем футболта вăй виçнĕ, 1:0 шутпа «Бурилы» мала тухнă.
Сентябрĕн 4-мĕшĕнче Кÿкеçри стадионта аслăрах каччăсен «Ротор» тата «ОМОН» командисем республикăра мала тухассишĕн футболла вылянă. «ОМОН» команда хирĕç вылякансене 4:1 шутпа парăнтарнă.
рубрикăна Сергей Гаврилов, Игорь Кириллов тытса пыраççĕ